tin shamon ki ek sham

ye surma.ī sī shaam

ragoñ meñ jis kī dauḌtā hai ḳhuuñ shafaq ke lāla-zār kā

kisī hasīna kī utārī oḌhnī kī tarah

malgajī sī shaam

jo lamha lamha ḳhāmushī ke band kī asiir hai

ye āsmāñ kī samt muñh uThā ke kis ko yaad kartī hai

ye misl-e-dāġh lāla-e-chaman

siyāh āñkhoñ meñ jo āñsuoñ kā nuur bhartī hai

to kyā use bhī hai ḳhabar ki āñsuoñ kī raushnī

charāġh-e-roz-o-shab se shoḳh-tar

hai rañg o nuur meñ

ye dhīre dhīre uTh ke āsmāñ

pe nasha kī tarah se chhā.ī jaatī hai

ishāra kartī hai tū

taare raushnī kī samt khiñch ke aa.e jaate haiñ

siyāhiyoñ meñ surḳhiyoñ

siyāhiyoñ meñ raushnī

kā ye hujūm dekhnā

to uñgliyoñ se paañv kī kamar talak

kamar se tā-ba-rū-e-ambarīñ

na jaane sard kyuuñ hai shaam

ye tujh se kis ne kah diyā ki dāman-e-chaman

meñ āftāb ko

zamīñ ne dafn kar diyā

ye surmai si sham

ragon mein jis ki dauDta hai KHun shafaq ke lala-zar ka

kisi hasina ki utari oDhni ki tarah

malgaji si sham

jo lamha lamha KHamushi ke band ki asir hai

ye aasman ki samt munh uTha ke kis ko yaad karti hai

ye misl-e-dagh lala-e-chaman

siyah aankhon mein jo aansuon ka nur bharti hai

to kya use bhi hai KHabar ki aansuon ki raushni

charagh-e-roz-o-shab se shoKH-tar

hai rang o nur mein

ye dhire dhire uTh ke aasman

pe nasha ki tarah se chhai jati hai

ishaara karti hai tu

tare raushni ki samt khinch ke aae jate hain

siyahiyon mein surKHiyon

siyahiyon mein raushni

ka ye hujum dekhna

to ungliyon se panw ki kamar talak

kamar se ta-ba-ru-e-ambarin

na jaane sard kyun hai sham

ye tujh se kis ne kah diya ki daman-e-chaman

mein aaftab ko

zamin ne dafn kar diya