tirgi

kitnī tārīk hai shab

har taraf kaalī balāoñ kā hujūm

ahraman jaag rahā hai kab se

dauḌte phirte haiñ tārīkī meñ

raat ke kitne bhayānak saa.e

dil laraz uThtā hai rah-rah ke mirā

is añdhere meñ jo aatī hai sadā

haat se haath ke Takrāne kī

raat tārīk hai aur tū bhī mire paas nahīñ

tere aane kī koī aas nahīñ

dasht-e-tanhā.ī hai aflāk kī pahnā.ī hai

mere āvāra ḳhayāloñ kī ghaTā chhā.ī hai

zindagī jaam se Takrātī hai mai-ḳhānoñ meñ

chhup ke baiThī hai magar aaj nihāñ-ḳhānoñ meñ

rang bhartī nahīñ afsānoñ meñ

chāñd kī samt hai parvāz junūñ vāloñ kī

baat hī aur hai dīvānoñ kī

ek hī jast meñ aflāk pe jā pahuñche haiñ

maiñ kahāñ huuñ ki añdhere ke sivā

aur yahāñ kuchh bhī nahīñ

duur hai qāfila-e-sub.h-e-bahār

āgahī raah meñ milte hue katrātī hai

raat tārīk hai aur tū bhī mire paas nahīñ

tere aane kī koī aas nahīñ

is añdhere meñ magar ḳhūn-e-jigar kī sham.eñ

apne vīrāne meñ raushan kar luuñ

mujh ko tā-sub.h isī taur pe jalnā hogā

jām-e-ḳhurshīd uThāne ke liye

nūr-e-ḳhurshīd ko palkoñ meñ chhupāne ke liye

kitni tarik hai shab

har taraf kali balaon ka hujum

ahraman jag raha hai kab se

dauDte phirte hain tariki mein

raat ke kitne bhayanak sae

dil laraz uThta hai rah-rah ke mera

is andhere mein jo aati hai sada

hat se hath ke Takrane ki

raat tarik hai aur tu bhi mere pas nahin

tere aane ki koi aas nahin

dasht-e-tanhai hai aflak ki pahnai hai

mere aawara KHayalon ki ghaTa chhai hai

zindagi jam se Takraati hai mai-KHanon mein

chhup ke baiThi hai magar aaj nihan-KHanon mein

rang bharti nahin afsanon mein

chand ki samt hai parwaz junun walon ki

baat hi aur hai diwanon ki

ek hi jast mein aflak pe ja pahunche hain

main kahan hun ki andhere ke siwa

aur yahan kuchh bhi nahin

dur hai qafila-e-subh-e-bahaar

aagahi rah mein milte hue katraati hai

raat tarik hai aur tu bhi mere pas nahin

tere aane ki koi aas nahin

is andhere mein magar KHun-e-jigar ki shamen

apne virane mein raushan kar lun

mujh ko ta-subh isi taur pe jalna hoga

jam-e-KHurshid uThane ke liye

nur-e-KHurshid ko palkon mein chhupane ke liye