tishnagi

ajab baat hai maiñ jab kabhī milā tum se

kuchh aur tishna-labī baḌh ga.ī mire andar

maiñ sochtā thā ki ik baar tum se milne par

tamām pyaas har ik aarzū tamām tishna-labī

qarār pā.egī bechain ruuh mirī

magar maiñ tum se milā to baḌh ga.ī kuchh aur tishna-labī

baḌā ajiib sā ehsās aur mahrūmī

ye kaunsā jazba hai us kā naam hai kyā

tavīl tar ho mulāqāt phir bhī tishna-labī

mire ḳhayāl se merā vajūd tum meñ hai

tumhāre qurb se takmīl merī hotī hai

tumhārā hijr banā detā hai adhūrā mujhe

maiñ apne aap ko phir se talāsh kartā huuñ

ajab baat hai main jab kabhi mila tum se

kuchh aur tishna-labi baDh gai mere andar

main sochta tha ki ek bar tum se milne par

tamam pyas har ek aarzu tamam tishna-labi

qarar paegi bechain ruh meri

magar main tum se mila to baDh gai kuchh aur tishna-labi

baDa ajib sa ehsas aur mahrumi

ye kaunsa jazba hai us ka nam hai kya

tawil tar ho mulaqat phir bhi tishna-labi

mere KHayal se mera wajud tum mein hai

tumhaare qurb se takmil meri hoti hai

tumhaara hijr bana deta hai adhura mujhe

main apne aap ko phir se talash karta hun