titliyan

jab āñkheñ band kartā huuñ

to aa jaatī haiñ

rañgīn titliyāñ in band āñkhoñ meñ

hazāroñ rañg apne aap bhar jaate haiñ

nazroñ meñ

ye uḌtī titliyāñ haiñ

hasīn kaliyoñ sī phūloñ sī

lachaktī Doltī lahrātī balkhātī havāoñ meñ

mahakte rañg gul buuTe sajātī haiñ fazāoñ meñ

magar jab aañkh khultī hai

to ye ehsās hotā hai

yahāñ bārūd bam rocket dhamākoñ kī sadā.eñ haiñ

bahut bojhal fazā.eñ haiñ

jo un ke par jalā deñge

vahī dahkī havā.eñ haiñ

yahī sab dekh kar maiñ apnī āñkheñ band kartā huuñ

ki in meñ rañg bharne titliyāñ phir lauT ā.eñgī

jab aankhen band karta hun

to aa jati hain

rangin titliyan in band aankhon mein

hazaron rang apne aap bhar jate hain

nazron mein

ye uDti titliyan hain

hasin kaliyon si phulon si

lachakti Dolti lahraati balkhati hawaon mein

mahakte rang gul buTe sajati hain fazaon mein

magar jab aankh khulti hai

to ye ehsas hota hai

yahan barud bam rocket dhamakon ki sadaen hain

bahut bojhal fazaen hain

jo un ke par jala denge

wahi dahki hawaen hain

yahi sab dekh kar main apni aankhen band karta hun

ki in mein rang bharne titliyan phir lauT aaengi