to aisa kyun nahin karte

to aisā kyuuñ nahīñ kahte

ki ye sapne hī mere karb ke zāmin haiñ un ke hī sabab se maiñ

jhulaste reg-zāroñ meñ barahna-pā bhaTaktā huuñ

inhī parchhā.iyoñ ko jism dene kī tamannā mujh se āsā.ish kā har lamha

maze kī niiñd āsābī sukūñ sab chhīn letī hai

yahī vo zahr hai jis ne

mire ḳhuuñ ke namak ko niim ke ras meñ badal Daalā

to aisā kyuuñ nahīñ kahte

ki maiñ sapnoñ ke is arzañg ko

sūraj kī jaltī bhaTTiyoñ meñ pheñk duuñ sab kuchh jalā Dālūñ

kisī lañgar-shikasta naav kī mānind dhāre par ravāñ ho jā.ūñ

har ik mauj ke hamrāh Dūbūñ aur ubhar aa.uuñ

to aisā kyuuñ na kar paa.e

vo jo kuchh merā hissa thā

mirā virsa thā

mujh se chhīn lete aur mujhe jañgal ke behis peḌ kī mānind ugā dete

jo har mausam ke hamrāh apnā pairāhan badaltā hai

havā ke jhoñke dete haiñ ijāzat jis taraf baḌhne kī baḌhtā hai

zamīñ kī narmiyoñ ko dekh kar apnī jaḌeñ paivast kartā hai

magar tum ye na kar paa.e

mirā virsa na mujh se chhīn paa.e aur vo pahlā shaḳhs jis ne sab se pahlā ḳhvāb dekhā thā

abhī tak mujh meñ zinda hai

to aisā kyuuñ nahīñ karte

unhī sapnoñ unhī parchhā.iyoñ ko jism de Daalo

jinheñ ik jism dene kī tamannā mujh se āsā.ish kā har lamha

maze kī niiñd a.asābī sukūñ sab chhīn letī hai

to aisa kyun nahin kahte

ki ye sapne hi mere karb ke zamin hain un ke hi sabab se main

jhulaste reg-zaron mein barahna-pa bhaTakta hun

inhi parchhaiyon ko jism dene ki tamanna mujh se aasaish ka har lamha

maze ki nind aasabi sukun sab chhin leti hai

yahi wo zahr hai jis ne

mere KHun ke namak ko nim ke ras mein badal Dala

to aisa kyun nahin kahte

ki main sapnon ke is arzang ko

suraj ki jalti bhaTTiyon mein phenk dun sab kuchh jala Dalun

kisi langar-shikasta naw ki manind dhaare par rawan ho jaun

har ek mauj ke hamrah Dubun aur ubhar aaun

to aisa kyun na kar pae

wo jo kuchh mera hissa tha

mera wirsa tha

mujh se chhin lete aur mujhe jangal ke behis peD ki manind uga dete

jo har mausam ke hamrah apna pairahan badalta hai

hawa ke jhonke dete hain ijazat jis taraf baDhne ki baDhta hai

zamin ki narmiyon ko dekh kar apni jaDen paiwast karta hai

magar tum ye na kar pae

mera wirsa na mujh se chhin pae aur wo pahla shaKHs jis ne sab se pahla KHwab dekha tha

abhi tak mujh mein zinda hai

to aisa kyun nahin karte

unhi sapnon unhi parchhaiyon ko jism de Dalo

jinhen ek jism dene ki tamanna mujh se aasaish ka har lamha

maze ki nind aasabi sukun sab chhin leti hai