to kya wo raat Dhal gai

tavīl vaqt ho gayā hazār din guzar ga.e

to kyā vo raat Dhal ga.ī to kyā vo zaḳhm bhar ga.e

mire tamām chārāgar isī gumāñ meñ haiñ ki maiñ

shab-e-firāq-e-yār ko shikast-e-kār de chukā

magar unheñ ḳhabar kahāñ ki ye shab-e-firāq-e-jāñ

abhī to apnī 'umr ke shurū' marhale meñ hai

abhī to āmad-e-sahar kī koī aas bhī nahīñ

abhī to mausam-e-bahār ās-pās bhī nahīñ

abhī to us kī yaad ke nuqūsh pesh-o-pas meñ haiñ

abhī to dil kī dhaḌkaneñ usī kī dastaras meñ haiñ

shab-e-sitam darāz hai jigar khapāyā jā.egā

abhī to us ke hijr meñ lahū bahāyā jā.egā

tawil waqt ho gaya hazar din guzar gae

to kya wo raat Dhal gai to kya wo zaKHm bhar gae

mere tamam chaaragar isi guman mein hain ki main

shab-e-firaq-e-yar ko shikast-e-kar de chuka

magar unhen KHabar kahan ki ye shab-e-firaq-e-jaan

abhi to apni 'umr ke shuru' marhale mein hai

abhi to aamad-e-sahar ki koi aas bhi nahin

abhi to mausam-e-bahaar aas-pas bhi nahin

abhi to us ki yaad ke nuqush pesh-o-pas mein hain

abhi to dil ki dhaDkanen usi ki dastaras mein hain

shab-e-sitam daraaz hai jigar khapaya jaega

abhi to us ke hijr mein lahu bahaya jaega