mere pyare watan

Arsh Malsiyani

mere pyare watan

Arsh Malsiyani

MORE BYArsh Malsiyani

    mere vatan, pyāre vatan

    rāhat ke gahvāre vatan

    har dil ke ujyāre vatan

    har aañkh ke taare vatan

    gul-posh terī vādiyāñ

    farhat-nishāñ rāhat-rasāñ

    tere chaman-zāroñ pe hai

    gulzār-e-jannat gumāñ

    har shāḳh phūloñ chhaḌī

    har naḳhl-e-tūbā hai yahāñ

    kausar ke chashme jā-ba-jā

    tasnīm har āb-e-ravāñ

    har barg rūh-e-tāzgī

    har phuul jān-e-gulsitāñ

    har baaġh bāġh-e-dil-kashī

    har baaġh bāġh-e-be-ḳhizāñ

    dilkash charāgāheñ tirī

    Dhoroñ ke jin meñ kārvāñ

    anjum-sifat gulhā-e-nau

    har taḳhta-e-gul āsmāñ

    naqsh-e-surayyā jā-ba-jā

    har har ravish ik kahkashāñ

    terī bahāreñ dā.imī

    terī bahāreñ jāvedāñ

    tujh meñ hai rūh-e-zindagī

    paiham ravāñ paiham davāñ

    dariyā vo tere tund-ḳhū

    jhīleñ vo terī be-karāñ

    shām-e-avadh ke lab pe hai

    husn-e-azal dāstāñ

    kahtī hai rāz-e-sarmadī

    sub.h-e-banaras zabāñ

    uḌtā hai haft-aflāk par

    un kār-ḳhānoñ dhuāñ

    jin meñ haiñ lākhoñ mehnatī

    san.at-garī ke pāsbāñ

    terī banaras zarī

    rashk-e-harīr-o-parniyāñ

    bīdar fankārī meñ haiñ

    san.at sab bārīkiyāñ

    azmat tire iqbāl

    tere pahāḌoñ se ayaañ

    dariyāoñ pānī, tarī

    taqdīs andāza-dāñ

    kyā 'bhārteñdu' ne kiyā

    gañgā lahroñ bayāñ

    'iqbāl' aur chakbast haiñ

    azmat ke terī naġhma-ḳhvāñ

    'josh' o 'firāq' o 'pant' haiñ

    tere adab ke tarjumāñ

    'tulsī' o 'ḳhusrav' haiñ terī

    tārīf meñ ratb-ul-lisāñ

    gaate haiñ naġhma mil ke sab

    ūñchā rahe terā nishāñ

    mere vatan, pyāre vatan

    rāhat ke gahvāre vatan

    har dil ke ujiyāre vatan

    har aañkh ke taare vatan

    tere nazāroñ ke nagīñ

    duniyā ḳhātam meñ nahīñ

    saare jahāñ meñ muntaḳhab

    kashmīr arz-e-hasīñ

    fitrat rañgīñ mo.ajaza

    firdaus bar-rū-e-zamīñ

    firdaus bar-rū-e-zamīñ

    haañ haañ hamīñ ast o hamīñ

    sarsabz jis ke dasht haiñ

    jis ke jabal haiñ surmagīñ

    meve ba-kasrat haiñ jahāñ

    shīrīñ misāl-e-añgbīñ

    har za.afarāñ ke phuul meñ

    aks-e-jamāl-e-hūra.īñ

    vo mālve chāñdnī

    gum jis meñ hoñ duniyā-o-dīñ

    is ḳhitta-e-nairañg meñ

    har ik fazā husn-āfrīñ

    har shai meñ husn-e-zindagī

    dilkash makāñ dilkash zamīñ

    har mard mard-e-ḳhūb-rū

    har ek aurat nāznīñ

    vo taaj ḳhush-paikarī

    har zāviye se dil-nashīñ

    san.at-garoñ ke daur

    ik yādgār-e-marmarīñ

    hotī hai jo har shaam ko

    faiz-e-shafaq se ahmarīñ

    dariyā maujoñ se alag

    ik bat-e-nazzāra-bīñ

    tā.er-e-nūrī koī

    parvāz karne ke qarīñ

    ahl-e-duniyā se alag

    ik ābid-e-uzlat-guzīñ

    naqsh-e-ajantā qasam

    jachtā nahīñ arzhañg-e-chī۔n

    shān-e-ellora dekh kar

    jhuktī hai aazar jabīñ

    chittauḌ ho āgara

    aise nahīñ qil.e kahīñ

    but-gar ho naqqāsh ho

    sab azmat amiiñ

    mere vatan, pyāre vatan

    rāhat ke gahvāre vatan

    har dil ke ujiyāre vatan

    har aañkh ke taare vatan

    dilkash tire dasht o chaman

    rañgīñ tire shahr o chaman

    tere javāñ rā.anā javāñ

    tere hasīñ gul pairahan

    ik anjuman duniyā hai ye

    is meñ sadr-e-anjuman

    tere muġhannī ḳhush-navā

    shā.er tire shīrīñ-suḳhan

    har zarra ik māh-e-mubīñ

    har ḳhaar rashk-e-nastarīñ

    ġhuncha tire sahrā hai

    ik nāfa-e-mushk-e-ḳhutan

    kañkar haiñ tere be-bahā

    patthar tire lāl-e-yaman

    bastī se jañgal ḳhūb-tar

    bāġhoñ se husn afroz ban

    vo mor vo kabk-e-darī

    vo chaukḌī bharte hiran

    rañgīñ-adā vo titliyāñ

    bāñbnī meñ vo nāgoñ ke phan

    vo sher jin ke naam se

    larze meñ aa.e ahrman

    khetoñ barkat se ayaañ

    faizān-e-rabb-e-zul-minan

    chashmoñ ke shīrīñ aab se

    lazzat-kashāñ kām-o-dahan

    tābinda terā ahd-e-nau

    raushan tirā ahd-e-kuhan

    kitnoñ ne tujh par kar diyā

    qurbān apnā maal dhan

    kitne shahīdoñ ko mile

    tere liye dār-o-rasan

    kitnoñ ko terā ishq thā

    kitnoñ ko thī terī lagan

    tere jafā-kash mehnatī

    rakhte haiñ azm-e-kohkan

    tere sipāhī sūrmā

    be-misl yaktā-e-zaman

    'bhisham' jin meñ hausla

    'arjun' jin meñ bāñkpan

    aalim jo faḳhr-e-ilm haiñ

    fankār nāzāñ jin pe fan

    'rā.e' o 'bos' o 'shergil'

    'dinkar,' 'jigar' 'maithli-sharan'

    'vallathol' 'māhir', bhārtī

    'bachchan', 'mahādevī' 'suman'

    'krishnan', 'nirālā', 'prem-chand'

    'tagore' o 'āzād' o 'raman'

    mere vatan, pyāre vatan

    rāhat ke gahvāre vatan

    har dil ke ujiyāre vatan

    har aañkh ke taare vatan

    khetī tirī har ik harī

    dilkash tirī ḳhush-manzarī

    terī bisāt-e-ḳhāk ke

    zarre haiñ mahr-o-mushtarī

    jhelum kaveri naag vo

    gañgā vo gañgotarī

    vo narbadā tamkanat

    vo shaukat-e-godāvarī

    pākīzgī sarjū vo

    jamunā vo ḳhush-gauharī

    dullarba āb-e-nīl-gūñ

    kashmīr nīlam-parī

    dilkash papīhe sadā

    koyal tāneñ mad-bharī

    tītar vo haq sirrahu

    tuutī vo vird-e-harī

    suufī tire har daur meñ

    karte rahe paiġhambarī

    'chishtī' o 'nanak' se milī

    faqr-o-ġhinā ko bartarī

    adl-e-jahāñgīrī meñ thī

    muzmar re.āyā-parvarī

    vo nau-ratan jin se huī

    tahzīb-e-daur-e-akbarī

    rakhte the afġhān-o-muġhal

    ik saulat-e-askandarī

    rānāon ke iqbāl

    hotī hai kis se ham-sarī

    sāvañt vo yodhdhā tire

    tere jiyāle vo jarī

    nīatī vidur aaj tak

    kartī hai terī rahbarī

    ab tak hai mash.hūr-e-zamāñ

    'chanakya' dānish-varī

    vayās aur vishvamitr se

    muniyoñ shān-e-qaisarī

    pātanjalī o sāñkh se

    rishiyoñ hikmat-parvarī

    baḳhshe tujhe in.ām-e-nau

    har daur charḳh-e-chambarī

    ḳhush-gauharī de aab ko

    aur ḳhaak ko ḳhush-jauharī

    zarroñ ko mahr-afshāniyāñ

    qatroñ ko dariyā-gustarī

    mere vatan, pyāre vatan

    rāhat ke gahvāre vatan

    har dil ke ujiyāre vatan

    har aañkh ke taare vatan

    rahbar-e-nau-e-bashar

    amn paiġhām-bar

    paale haiñ ne god meñ

    sāhib-ḳhirad sāhib-e-nazar

    afzal-tarīñ in sab meñ hai

    baapū nām-e-mo'tabar

    har lafz jis dil-nashīñ

    har baat jis pur-asar

    jis ne lagāyā dahr meñ

    na.ara ye be-ḳhauf-o-ḳhatar

    be-kār haiñ tīr-o-sināñ

    be-sūd haiñ teġh-o-tabar

    hinsā rasta jhuuT hai

    haq hai ahinsā Dagar

    darmāñ hai ye har dard

    ye har maraz chāra-gar

    jañgāh-e-ālam meñ koī

    is se nahīñ behtar sipar

    kartā huuñ maiñ tere liye

    ab ye duā-e-muḳhtasar

    raunaq pe hoñ tere chaman

    sarsabz hoñ tere shajar

    naḳhl-e-umīd-e-behtarī

    har fasl meñ ho bārvar

    koshish ho duniyā meñ koī

    ḳhitta na ho zer-o-zabar

    terā har ik baasī rahe

    neko-sifat neko-siyar

    har zan salīqa-mañd ho

    har mard ho sāhib-hunar

    jab tak haiñ ye arz o falak

    jab tak haiñ ye shams o qamar

    mere vatan, pyāre vatan

    rāhat ke gahvāre vatan

    har dil ke ujyāre vatan

    har aañkh ke taare vatan

    mere watan, pyare watan

    rahat ke gahware watan

    har dil ke ujyare watan

    har aankh ke tare watan

    gul-posh teri wadiyan

    farhat-nishan rahat-rasan

    tere chaman-zaron pe hai

    gulzar-e-jannat ka guman

    har shaKH phulon ki chhaDi

    har naKHl-e-tuba hai yahan

    kausar ke chashme ja-ba-ja

    tasnim har aab-e-rawan

    har barg ruh-e-tazgi

    har phul jaan-e-gulsitan

    har bagh bagh-e-dil-kashi

    har bagh bagh-e-be-KHizan

    dilkash charagahen teri

    Dhoron ke jin mein karwan

    anjum-sifat gulha-e-nau

    har taKHta-e-gul aasman

    naqsh-e-surayya ja-ba-ja

    har har rawish ek kahkashan

    teri bahaaren daimi

    teri bahaaren jawedan

    tujh mein hai ruh-e-zindagi

    paiham rawan paiham dawan

    dariya wo tere tund-KHu

    jhilen wo teri be-karan

    sham-e-awadh ke lab pe hai

    husn-e-azal ki dastan

    kahti hai raaz-e-sarmadi

    subh-e-banaras ki zaban

    uDta hai haft-aflak par

    un kar-KHanon ka dhuan

    jin mein hain lakhon mehnati

    sanat-gari ke pasban

    teri banaras ki zari

    rashk-e-harir-o-parniyan

    bidar ki fankari mein hain

    sanat ki sab barikiyan

    azmat tere iqbaal ki

    tere pahaDon se ayan

    dariyaon ka pani, tari

    taqdis ka andaza-dan

    kya 'bhaartendu' ne kiya

    ganga ki lahron ka bayan

    'iqbaal' aur chakbast hain

    azmat ke teri naghma-KHwan

    'josh' o 'firaq' o 'pant' hain

    tere adab ke tarjuman

    'tulsi' o 'KHusraw' hain teri

    tarif mein ratb-ul-lisan

    gate hain naghma mil ke sab

    uncha rahe tera nishan

    mere watan, pyare watan

    rahat ke gahware watan

    har dil ke ujiyare watan

    har aankh ke tare watan

    tere nazaron ke nagin

    duniya ki KHatam mein nahin

    sare jahan mein muntaKHab

    kashmir ki arz-e-hasin

    fitrat ka rangin moajaza

    firdaus bar-ru-e-zamin

    firdaus bar-ru-e-zamin

    han han hamin ast o hamin

    sarsabz jis ke dasht hain

    jis ke jabal hain surmagin

    mewe ba-kasrat hain jahan

    shirin misal-e-angbin

    har zafaran ke phul mein

    aks-e-jamal-e-hurain

    wo malwe ki chandni

    gum jis mein hon duniya-o-din

    is KHitta-e-nairang mein

    har ek faza husn-afrin

    har shai mein husn-e-zindagi

    dilkash makan dilkash zamin

    har mard mard-e-KHub-ru

    har ek aurat naznin

    wo taj ki KHush-paikari

    har zawiye se dil-nashin

    sanat-garon ke daur ki

    ek yaadgar-e-marmarin

    hoti hai jo har sham ko

    faiz-e-shafaq se ahmarin

    dariya ki maujon se alag

    ya ek bat-e-nazzara-bin

    ya taer-e-nuri koi

    parwaz karne ke qarin

    ya ahl-e-duniya se alag

    ek aabid-e-uzlat-guzin

    naqsh-e-ajanta ki qasam

    jachta nahin arzhang-e-chi۔n

    shan-e-ellora dekh kar

    jhukti hai aazar ki jabin

    chittauD ho ya aagara

    aise nahin qile kahin

    but-gar ho ya naqqash ho

    tu sab ki azmat ka amin

    mere watan, pyare watan

    rahat ke gahware watan

    har dil ke ujiyare watan

    har aankh ke tare watan

    dilkash tere dasht o chaman

    rangin tere shahr o chaman

    tere jawan raana jawan

    tere hasin gul pairahan

    ek anjuman duniya hai ye

    tu is mein sadr-e-anjuman

    tere mughanni KHush-nawa

    shaer tere shirin-suKHan

    har zarra ek mah-e-mubin

    har KHar rashk-e-nastarin

    ghuncha tere sahra ka hai

    ek nafa-e-mushk-e-KHutan

    kankar hain tere be-baha

    patthar tere lal-e-yaman

    basti se jangal KHub-tar

    baghon se husn afroz ban

    wo mor wo kabk-e-dari

    wo chaukDi bharte hiran

    rangin-ada wo titliyan

    banbni mein wo nagon ke phan

    wo sher jin ke nam se

    larze mein aae ahrman

    kheton ki barkat se ayan

    faizan-e-rabb-e-zul-minan

    chashmon ke shirin aab se

    lazzat-kashan kaam-o-dahan

    tabinda tera ahd-e-nau

    raushan tera ahd-e-kuhan

    kitnon ne tujh par kar diya

    qurban apna mal dhan

    kitne shahidon ko mile

    tere liye dar-o-rasan

    kitnon ko tera ishq tha

    kitnon ko thi teri lagan

    tere jafa-kash mehnati

    rakhte hain azm-e-kohkan

    tere sipahi surma

    be-misl yakta-e-zaman

    'bhisham' sa jin mein hausla

    'arjun' sa jin mein bankpan

    aalim jo faKHr-e-ilm hain

    fankar nazan jin pe fan

    'rae' o 'bos' o 'shergil'

    'dinkar,' 'jigar' 'maithli-sharan'

    'wallathol' 'mahir', bhaarti

    'bachchan', 'mahadewi' 'suman'

    'krishnan', 'nirala', 'prem-chand'

    'tagore' o 'azad' o 'raman'

    mere watan, pyare watan

    rahat ke gahware watan

    har dil ke ujiyare watan

    har aankh ke tare watan

    kheti teri har ek hari

    dilkash teri KHush-manzari

    teri bisat-e-KHak ke

    zarre hain mahr-o-mushtari

    jhelum kaweri nag wo

    ganga ki wo gangotari

    wo narbada ki tamkanat

    wo shaukat-e-godawari

    pakizgi sarju ki wo

    jamuna ki wo KHush-gauhari

    dullarba aab-e-nil-gun

    kashmir ki nilam-pari

    dilkash papihe ki sada

    koyal ki tanen mad-bhari

    titar ka wo haq sirrahu

    tuti ka wo wird-e-hari

    sufi tere har daur mein

    karte rahe paighambari

    'chishti' o 'nanak' se mili

    faqr-o-ghina ko bartari

    adl-e-jahangiri mein thi

    muzmar reaya-parwari

    wo nau-ratan jin se hui

    tahzib-e-daur-e-akbari

    rakhte the afghan-o-mughal

    ek saulat-e-askandari

    ranaon ke iqbaal ki

    hoti hai kis se ham-sari

    sawant wo yodhdha tere

    tere jiyale wo jari

    niati widur ki aaj tak

    karti hai teri rahbari

    ab tak hai mashhur-e-zaman

    'chanakya' ki danish-wari

    wayas aur wishwamitr se

    muniyon ki shan-e-qaisari

    patanjali o sankh se

    rishiyon ki hikmat-parwari

    baKHshe tujhe inam-e-nau

    har daur charKH-e-chambari

    KHush-gauhari de aab ko

    aur KHak ko KHush-jauhari

    zarron ko mahr-afshaniyan

    qatron ko dariya-gustari

    mere watan, pyare watan

    rahat ke gahware watan

    har dil ke ujiyare watan

    har aankh ke tare watan

    tu rahbar-e-nau-e-bashar

    tu amn ka paigham-bar

    pale hain tu ne god mein

    sahib-KHirad sahib-e-nazar

    afzal-tarin in sab mein hai

    bapu ka nam-e-mo'tabar

    har lafz jis ka dil-nashin

    har baat jis ki pur-asar

    jis ne lagaya dahr mein

    nara ye be-KHauf-o-KHatar

    be-kar hain tir-o-sinan

    be-sud hain tegh-o-tabar

    hinsa ka rasta jhuT hai

    haq hai ahinsa ki Dagar

    darman hai ye har dard ka

    ye har maraz ka chaara-gar

    jangah-e-alam mein koi

    is se nahin behtar sipar

    karta hun main tere liye

    ab ye dua-e-muKHtasar

    raunaq pe hon tere chaman

    sarsabz hon tere shajar

    naKHl-e-umid-e-behtari

    har fasl mein ho barwar

    koshish ho duniya mein koi

    KHitta na ho zer-o-zabar

    tera har ek basi rahe

    neko-sifat neko-siyar

    har zan saliqa-mand ho

    har mard ho sahib-hunar

    jab tak hain ye arz o falak

    jab tak hain ye shams o qamar

    mere watan, pyare watan

    rahat ke gahware watan

    har dil ke ujyare watan

    har aankh ke tare watan

    Source :
    • Book : Kulliyat-e-Arsh (Pg. 297)
    • Author : Arsh Malsiyani
    • Publication : Ali Hujwiri Publisher H. 811, A Androon, Akbari Gate, Lahore
    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY