ai ishq kahin le chal

ai ishq kahīñ le chal is paap kī bastī se

nafrat-gah-e-ālam se la.anat-gah-e-hastī se

in nafs-parastoñ se is nafs-parastī se

duur aur kahīñ le chal!

ai ishq kahīñ le chal!

ham prem pujārī haiñ to prem kanhiyyā hai

to prem kanhiyyā hai ye prem kī nayyā hai

ye prem kī nayyā hai tū is kā khevayyā hai

kuchh fikr nahīñ le chal!

ai ishq kahīñ le chal!

be-rahm zamāne ko ab chhoḌ rahe haiñ ham

bedard azīzoñ se muñh moḌ rahe haiñ ham

jo aas ki thī vo bhī ab toḌ rahe haiñ ham

bas taab nahīñ le chal!

ai ishq kahīñ le chal!

ye jabr-kada āzād afkār kā dushman hai

armānoñ kā qātil hai ummīdoñ kā rahzan hai

jazbāt kā maqtal hai jazbāt kā madfan hai

chal yaañ se kahīñ le chal!

ai ishq kahīñ le chal!

aapas meñ chhal aur dhoke sansār kī rīteñ haiñ

is paap kī nagrī meñ ujḌī huī parteñ haiñ

yaañ nyāye kī hāreñ haiñ annyāye kī jīteñ haiñ

sukh chain nahīñ le chal!

ai ishq kahīñ le chal!

ik mazbah-e-jazbāt-o-afkār hai ye duniyā

ik maskan-e-ashrār-o-āzār hai ye duniyā

ik maqtal-e-ahrār-o-abrār hai ye duniyā

duur is se kahīñ le chal!

ai ishq kahīñ le chal!

ye dard bharī duniyā bastī hai gunāhoñ kī

dil-chāk umīdoñ kī saffāk nigāhoñ kī

zulmoñ kī jafāoñ kī aahoñ kī karāhoñ kī

haiñ ġham se hazīñ le chal!

ai ishq kahīñ le chal!

ā.ankhoñ meñ samā.ī hai ik ḳhvāb-numā duniyā

tāroñ kī tarah raushan mahtāb-numā diyā

jannat kī tarah rañgīñ shādāb-numā duniyā

lillāh vahīñ le chal!

ai ishq kahīñ le chal!

vo tiir ho sāgar kī rut chhā.ī ho phāgun kī

phūloñ se mahaktī ho purvā.ī ghane ban kī

yā aaTh pahar jis meñ jhaḌ badlī ho sāvan kī

jī bas meñ nahīñ le chal!

ai ishq kahīñ le chal!

qudarat ho himāyat par hamdard ho qismat bhī

'salmā' bhī ho pahlū meñ 'salmā' kī mohabbat bhī

har shai se farāġhat ho aur terī ināyat bhī

ai tifl-e-hasīñ le chal!

ai ishq kahīñ le chal!

ai ishq hameñ le chal ik nuur kī vaadī meñ

ik ḳhvāb kī duniyā meñ ik tuur kī vaadī meñ

hūroñ ke ḳhayālāt-e-masrūr kī vaadī meñ

tā ḳhuld-e-barīñ le chal!

ai ishq kahīñ le chal!

sansār ke us paar ik is tarah kī bastī ho

jo sadiyoñ se insāñ kī sūrat ko tarastī ho

aur jis ke nazāroñ par tanhā.ī barastī ho

yuuñ ho to vahīñ le chal!

ai ishq kahīñ le chal!

maġhrib kī havāoñ se āvāz sī aatī hai

aur ham ko samundar ke us paar bulātī hai

shāyad koī tanhā.ī kā des batātī hai

chal is ke qarīñ le chal!

ai ishq kahīñ le chal!

ik aisī fazā jis tak ġham kī na rasā.ī ho

duniyā kī havā jis meñ sadiyoñ se na aa.ī ho

ai ishq jahāñ tū ho aur terī ḳhudā.ī ho

ai ishq vahīñ le chal!

ai ishq kahīñ le chal!

ek aisī jagah jis meñ insān na baste hoñ

ye makr o jafā-pesha haivān na baste hoñ

insāñ kī qabā meñ ye shaitān na baste hoñ

to ḳhauf nahīñ le chal!

ai ishq kahīñ le chal!

barsāt kī matvālī ghanghor ghaTāoñ meñ

kohsār ke dāman kī mastāna havāoñ meñ

yā chāñdnī rātoñ kī shaffāf fazāoñ meñ

ai zohra-jabīñ le chal!

ai ishq kahīñ le chal!

in chāñd sitāroñ ke bikhre hue shahroñ meñ

in nuur kī kirnoñ kī Thahrī huī nahroñ meñ

Thahrī huī nahroñ meñ soī huī lahroñ meñ

ai ḳhizr-e-hasīñ le chal!

ai ishq kahīñ le chal!

ik aisī bahisht aa.iiñ vaadī meñ pahuñch jaa.eñ

jis meñ kabhī duniyā ke ġham dil ko na taḌpā.eñ

aur jis kī bahāroñ meñ jiine ke maze aa.eñ

le chal tū vahīñ le chal!

ai ishq kahīñ le chal!

ai ishq kahin le chal is pap ki basti se

nafrat-gah-e-alam se lanat-gah-e-hasti se

in nafs-paraston se is nafs-parasti se

dur aur kahin le chal!

ai ishq kahin le chal!

hum prem pujari hain to prem kanhiyya hai

to prem kanhiyya hai ye prem ki nayya hai

ye prem ki nayya hai tu is ka khewayya hai

kuchh fikr nahin le chal!

ai ishq kahin le chal!

be-rahm zamane ko ab chhoD rahe hain hum

bedard azizon se munh moD rahe hain hum

jo aas ki thi wo bhi ab toD rahe hain hum

bas tab nahin le chal!

ai ishq kahin le chal!

ye jabr-kada aazad afkar ka dushman hai

armanon ka qatil hai ummidon ka rahzan hai

jazbaat ka maqtal hai jazbaat ka madfan hai

chal yan se kahin le chal!

ai ishq kahin le chal!

aapas mein chhal aur dhoke sansar ki riten hain

is pap ki nagri mein ujDi hui parten hain

yan nyaye ki haaren hain annyaye ki jiten hain

sukh chain nahin le chal!

ai ishq kahin le chal!

ek mazbah-e-jazbaat-o-afkar hai ye duniya

ek maskan-e-ashrar-o-azar hai ye duniya

ek maqtal-e-ahrar-o-abrar hai ye duniya

dur is se kahin le chal!

ai ishq kahin le chal!

ye dard bhari duniya basti hai gunahon ki

dil-chaak umidon ki saffak nigahon ki

zulmon ki jafaon ki aahon ki karahon ki

hain gham se hazin le chal!

ai ishq kahin le chal!

aaankhon mein samai hai ek KHwab-numa duniya

taron ki tarah raushan mahtab-numa diya

jannat ki tarah rangin shadab-numa duniya

lillah wahin le chal!

ai ishq kahin le chal!

wo tir ho sagar ki rut chhai ho phagun ki

phulon se mahakti ho purwai ghane ban ki

ya aaTh pahar jis mein jhaD badli ho sawan ki

ji bas mein nahin le chal!

ai ishq kahin le chal!

qudarat ho himayat par hamdard ho qismat bhi

'salma' bhi ho pahlu mein 'salma' ki mohabbat bhi

har shai se faraghat ho aur teri inayat bhi

ai tifl-e-hasin le chal!

ai ishq kahin le chal!

ai ishq hamein le chal ek nur ki wadi mein

ek KHwab ki duniya mein ek tur ki wadi mein

huron ke KHayalat-e-masrur ki wadi mein

ta KHuld-e-barin le chal!

ai ishq kahin le chal!

sansar ke us par ek is tarah ki basti ho

jo sadiyon se insan ki surat ko tarasti ho

aur jis ke nazaron par tanhai barasti ho

yun ho to wahin le chal!

ai ishq kahin le chal!

maghrib ki hawaon se aawaz si aati hai

aur hum ko samundar ke us par bulati hai

shayad koi tanhai ka des batati hai

chal is ke qarin le chal!

ai ishq kahin le chal!

ek aisi faza jis tak gham ki na rasai ho

duniya ki hawa jis mein sadiyon se na aai ho

ai ishq jahan tu ho aur teri KHudai ho

ai ishq wahin le chal!

ai ishq kahin le chal!

ek aisi jagah jis mein insan na baste hon

ye makr o jafa-pesha haiwan na baste hon

insan ki qaba mein ye shaitan na baste hon

to KHauf nahin le chal!

ai ishq kahin le chal!

barsat ki matwali ghanghor ghaTaon mein

kohsar ke daman ki mastana hawaon mein

ya chandni raaton ki shaffaf fazaon mein

ai zohra-jabin le chal!

ai ishq kahin le chal!

in chand sitaron ke bikhre hue shahron mein

in nur ki kirnon ki Thahri hui nahron mein

Thahri hui nahron mein soi hui lahron mein

ai KHizr-e-hasin le chal!

ai ishq kahin le chal!

ek aisi bahisht aain wadi mein pahunch jaen

jis mein kabhi duniya ke gham dil ko na taDpaen

aur jis ki bahaaron mein jine ke maze aaen

le chal tu wahin le chal!

ai ishq kahin le chal!