jamuna

dhīmī dhīmī bahne vaalī ek nahr-e-dil-nashīñ

āb-e-jū chhoTī sī ik nāzuk ḳhirām-o-nāznīñ

tishnagī-e-shauq gañgā meñ bujhāne ke liye

jā rahī hai apnī hastī ko miTāne ke liye

ye vo jamunā hai ki dilkash jis kā hai andāz-e-husn

dekhte haiñ aah āshiq jis kā ḳhvāb-e-nāz-e-husn

ye vo jamunā hai ki gaatī haiñ suḳhnavar jis ke giit

mutribān-e-ḳhush-gulū kī haiñ zabāñ par jis ke giit

ye vo jamunā hai jahāñ le le ke jalvat ke maze

luuTe haiñ ushshāq ne barsoñ mohabbat ke maze

ye vo jamunā hai ki rādhā sī hasīñ ne muddatoñ

brij kī ik pāk-dāman nāznīñ ne muddatoñ

bansī vaale kī judā.ī meñ uḌā kar sar pe ḳhaak

apne ashkoñ se kiyā hai dāman-e-sāhil ko paak

ye vo jamunā hai jahāñ ik bānū-e--parda-nashīñ

āgara meñ mahv-e-āsā.ish hai jo zer-e-zamīñ

ruḳh se āhista ulaT kar chādar-e-āb-e-ravāñ

dekhtī thī muskurā kar manzar-e-āb-e-ravāñ

aah ai nahr-e-latāfat aah ai bahr-e-jamāl

dil meñ hai pahlū-nashīñ ab tak tirā naqsh-e-ḳhayāl

garche tujh meñ ab nahīñ vo jalvā-e-shān-e-kuhan

vo hasīñ to hai ki ai sham-e-shabistān-e-kuhan

husn-e-rafta meñ hai tere ab bhī ik dilkash adā

tere kumlā.e hue phūloñ meñ hai bū-e-vafā

tū hai dariyā-e-muqaddas tū ki hai isyāñ se paak

terā dāman hai abhī ālā.ish-e-insāñ se paak

terī shaukat ke haiñ shāhid ai vafādār-e-kuhan

tere burjoñ aur tire qiloñ ke āsār-e-kuhan

tere sāhil se Tapaktī ab bhī hai shān-e-buland

āsmāñ-farsā haiñ ab bhī tere aivān-e-buland

tere farsūda nishāñ haiñ naqsh-e-nāz-e-husn-o-ishq

terī maujoñ meñ nihāñ hai āh-e-rāz-e-husn-o-ishq

aah o rañgīñ-adā o dillī vaalī nāznīñ

o do-ālam ke hasīnoñ se nirālī nāznīñ

yād-e-ayyāme ki dilkash the tire naqsh-o-nigār

din murādoñ ke the aur josh-e-javānī kā ubhār

chaḌh ke jab mīnār par ik la'bat-e-nāz-āfrīñ

dekhtī thī terī maujoñ kī adā-e-dil-nashīñ

vo kaf-e-sailāb vo shor-e-talātum haa.e haa.e

terī maujoñ kā vo andāz-e-tabassum haa.e haa.e

dhīmī dhīmī vo tirī raftār bal khaa.ī huī

vo nazar jheñptī huī chitvan vo sharmā.ī huī

vo surīlī naġhma-e-josh-e-talātum kī sadā

aah vo dilkash tire sāz-e-tarannum kī sadā

brij kī o pāk-dāman o muqaddas nāznīñ

naqsh hai dil par tirī ik ik adā-e-dil-nashīñ

ab kahāñ jamunā tirī maujoñ kī mastāna vo chaal

ab kahāñ paanī ke jharne aur vo lutf-e-barshgāl

ab kahāñ chhoTā sā vo rādhā kā kunj-e-ḳhush-gavār

ab kahāñ vo aah mathurā tere phūloñ kī bahār

ab kahāñ vo bansī vaale kī adā-e-jāñ-navāz

ab kahāñ vo aah murlī kī sadā-e-jāñ-navāz

ab kahāñ vo ḳhalvat-e-rāz-o-niyāz-e-husn-o-ishq

be-sadā zer-e-zamīñ haiñ aah sāz-e-husn-o-ishq

o talavvun-kesh o kāfir-adā aur dūñ-shi.ār

tū ne badle rañg lākhoñ aah vaz-e-rozgār

ḳhaak uTh kar aah sar par dāman-e-sāhil uḌā

TukḌe TukḌe kar jigar ko pāra-hā-e-dil uḌā

sozish-e-ġham se pighal jā aah ai reg-e-ravāñ

zarre zarre meñ tere tasvīr-e-ibrat hai nihāñ

ab kahāñ vo kunj-e-dil-kash ab kahāñ rādhā kā aish

hai ba-rañg-e-ḳhanda-e-gul be-baqā duniyā kā aish

ai ḳhushā qismat tirī jamunā ḳhushā tere nasīb

vāh-vā tere muqaddar vāh-vā tere nasīb

tū ne dekhī hai bahut din murlī vaale kī adā

donoñ-ālam ke hasīnoñ se nirāle kī adā

aur sunī bansī kī hai barsoñ sadā-e-dil-navāz

dāstān-e-dard-e-dil afsāna-e-soz-o-gudāz

mahsharisatān-e-alam kambaḳht hai kar dil ko chaak

chiir pahlū ko ki nikleñ nāla-hā-e-dard-nāk

tā-kujā ye sar-guzasht-e-dāstān-e-dard-o-ġham

chheḌ ai jamunā koī taaza bayān-e-dard-e-ġham

ho na lekin aah terā shor-e-mātam dil-ḳharāsh

tere nāloñ kī sadā ya.anī ho kam kam dil-ḳharāsh

ai lab-e-sāhil sunā sītoñ kī ismat kā bayāñ

parda-e-afsāna meñ soz-e-mohabbat kā bayāñ

tere pahlū meñ hai ye kis hūr-vash kī yādgār

jis se rātoñ ko uThā karte haiñ aahoñ ke sharār

aah farsūda-nishān-e-ismat-e-jāñ-bāz tū

kis parī-paikar kā hai naqsh-e-vafā-e-nāz tū

hai tirī ta.amīr meñ muzmar vahī shān-e-vafā

terī har ḳhisht-e-kuhan hai jauhar-e-kān-e-vafā

ġhul na kar āhista āhista ho ai jamunā ravāñ

tāj-e-ismat kā yahāñ har ik dur-e-yaktā nihāñ

ai zahe shaukat tirī jamunā zahe ezāz-o-shāñ

tujh pe lahrāyā kiyā islām kā sadiyoñ nishāñ

haa.e vo turkoñ ke daste aur sangīnoñ kī shaan

tirchhe-bāñke vo javāñ vo chaar ā.īnoñ kī shaan

be-sadā zer-e-zamīñ hai bazm-e-shāhān-e-ġhayūr

aah jamunā tujh meñ lekin hai vahī shān-e-ġhurūr

aah o shikva-tarāz-e-dast bedād-e-ajal

ro na ḳhūn-e-ārzū o mahv-e-fariyād-e-ajal

aah is dār-e-fanā meñ hai baqā kis ke liye

chhoḌne vaalā hai shāhīn-e-qazā kis ke liye

aah us ḳhvāb-e-shabāna kā hai mujh ko intizār

us surūr-e-āshiqāna kā hai mujh ko intizār

terī ik ik mauj thī jab aah tūfāñ-kosh-e-shauq

halqa-e-girdāb thā jab hāla-e-āġhosh-e-shauq

jab kisī ke gesu-e-pur-ḳham kī saudā.ī thī tū

aur lab-e-sāhil pe rauza kī tamāshā.ī thī tū

aah jamunā tujh ko daur-e-pāstānī kī qasam

shaukat-e-derīna-e-sāhib-qirānī kī qasam

kyā na hoñge tujh ko vo dilkash manāzir phir nasīb

azmat-e-islām ke agle mazāhir phir nasīb

ho ke muztar aah josh-e-iztirāb-e-dil se kyā

yūñhī Takrāyā karegī sar ko tū sāhil se kyā

kaun ye parda-nashīñ hai tere dāman meñ nihāñ

kis kā chehra hai naqāb-e-zulf-e-pur-fan meñ nihāñ

terī maujoñ meñ hai ye kis kī sadā-e-dil-fareb

gā rahī hai kaun ye ġhārat-gar-e-sabr-o-shakeb

ḳhāna-e-dil meñ hai tere kaun mahv-e-raqs-e-nāz

aa rahī hai kis kī chhāgal kī sadā-e-jāñ-navāz

vo saman-andām hai ye shāhid-e-parda-nashīñ

jis ke phūloñ meñ hai ab tak bū-e-firdaus-e-barīñ

hūreñ aa kar ḳhuld se tauf-e-mazār-e-pāk ko

jhāḌtī palkoñ se haiñ gard-o-ḳhas-o-ḳhāshāk ko

aah ai naqsh-e-nigār-e-shaukat-e-ahd-e-kuhan

aah ai ā.īna-dār-e-shaukat-e-ahd-e-kuhan

ham ne naanā tujh meñ ab vo shān-e-barnā.ī nahīñ

vo ġhurūr-e-husn vo tamkīñ vo ra.anā.ī nahīñ

ham ne maanā tere chehre kī ziyā jaatī rahī

terī maujoñ kī vo mastāna adā jaatī rahī

muñh pe gumnāmī kā āñchal le na ai parda-nashīñ

yuuñ hī sargarm-e-ḳhirām-e-nāz rah ai nāznīñ

sar ko Takrāyā kare sāhil se sail-e-rozgār

terī shohrat ke nishāñ sadiyoñ raheñge yādgār

dhimi dhimi bahne wali ek nahr-e-dil-nashin

aab-e-ju chhoTi si ek nazuk KHiram-o-naznin

tishnagi-e-shauq ganga mein bujhane ke liye

ja rahi hai apni hasti ko miTane ke liye

ye wo jamuna hai ki dilkash jis ka hai andaz-e-husn

dekhte hain aah aashiq jis ka KHwab-e-naz-e-husn

ye wo jamuna hai ki gati hain suKHnawar jis ke git

mutriban-e-KHush-gulu ki hain zaban par jis ke git

ye wo jamuna hai jahan le le ke jalwat ke maze

luTe hain ushshaq ne barson mohabbat ke maze

ye wo jamuna hai ki radha si hasin ne muddaton

brij ki ek pak-daman naznin ne muddaton

bansi wale ki judai mein uDa kar sar pe KHak

apne ashkon se kiya hai daman-e-sahil ko pak

ye wo jamuna hai jahan ek banu-e--parda-nashin

aagara mein mahw-e-asaish hai jo zer-e-zamin

ruKH se aahista ulaT kar chadar-e-ab-e-rawan

dekhti thi muskura kar manzar-e-ab-e-rawan

aah ai nahr-e-latafat aah ai bahr-e-jamal

dil mein hai pahlu-nashin ab tak tera naqsh-e-KHayal

garche tujh mein ab nahin wo jalwa-e-shan-e-kuhan

wo hasin to hai ki ai sham-e-shabistan-e-kuhan

husn-e-rafta mein hai tere ab bhi ek dilkash ada

tere kumlae hue phulon mein hai bu-e-wafa

tu hai dariya-e-muqaddas tu ki hai isyan se pak

tera daman hai abhi aalaish-e-insan se pak

teri shaukat ke hain shahid ai wafadar-e-kuhan

tere burjon aur tere qilon ke aasar-e-kuhan

tere sahil se Tapakti ab bhi hai shan-e-buland

aasman-farsa hain ab bhi tere aiwan-e-buland

tere farsuda nishan hain naqsh-e-naz-e-husn-o-ishq

teri maujon mein nihan hai aah-e-raaz-e-husn-o-ishq

aah o rangin-ada o dilli wali naznin

o do-alam ke hasinon se nirali naznin

yaad-e-ayyame ki dilkash the tere naqsh-o-nigar

din muradon ke the aur josh-e-jawani ka ubhaar

chaDh ke jab minar par ek la'bat-e-naz-afrin

dekhti thi teri maujon ki ada-e-dil-nashin

wo kaf-e-sailab wo shor-e-talatum hae hae

teri maujon ka wo andaz-e-tabassum hae hae

dhimi dhimi wo teri raftar bal khai hui

wo nazar jhenpti hui chitwan wo sharmai hui

wo surili naghma-e-josh-e-talatum ki sada

aah wo dilkash tere saz-e-tarannum ki sada

brij ki o pak-daman o muqaddas naznin

naqsh hai dil par teri ek ek ada-e-dil-nashin

ab kahan jamuna teri maujon ki mastana wo chaal

ab kahan pani ke jharne aur wo lutf-e-barshgal

ab kahan chhoTa sa wo radha ka kunj-e-KHush-gawar

ab kahan wo aah mathura tere phulon ki bahaar

ab kahan wo bansi wale ki ada-e-jaan-nawaz

ab kahan wo aah murli ki sada-e-jaan-nawaz

ab kahan wo KHalwat-e-raaz-o-niyaz-e-husn-o-ishq

be-sada zer-e-zamin hain aah saz-e-husn-o-ishq

o talawwun-kesh o kafir-ada aur dun-shiar

tu ne badle rang lakhon aah waz-e-rozgar

KHak uTh kar aah sar par daman-e-sahil uDa

TukDe TukDe kar jigar ko para-ha-e-dil uDa

sozish-e-gham se pighal ja aah ai reg-e-rawan

zarre zarre mein tere taswir-e-ibrat hai nihan

ab kahan wo kunj-e-dil-kash ab kahan radha ka aish

hai ba-rang-e-KHanda-e-gul be-baqa duniya ka aish

ai KHusha qismat teri jamuna KHusha tere nasib

wah-wa tere muqaddar wah-wa tere nasib

tu ne dekhi hai bahut din murli wale ki ada

donon-alam ke hasinon se nirale ki ada

aur suni bansi ki hai barson sada-e-dil-nawaz

dastan-e-dard-e-dil afsana-e-soz-o-gudaz

mahsharisatan-e-alam kambaKHt hai kar dil ko chaak

chir pahlu ko ki niklen nala-ha-e-dard-nak

ta-kuja ye sar-guzasht-e-dastan-e-dard-o-gham

chheD ai jamuna koi taza bayan-e-dard-e-gham

ho na lekin aah tera shor-e-matam dil-KHarash

tere nalon ki sada yani ho kam kam dil-KHarash

ai lab-e-sahil suna siton ki ismat ka bayan

parda-e-afsana mein soz-e-mohabbat ka bayan

tere pahlu mein hai ye kis hur-wash ki yaadgar

jis se raaton ko uTha karte hain aahon ke sharar

aah farsuda-nishan-e-ismat-e-jaan-baz tu

kis pari-paikar ka hai naqsh-e-wafa-e-naz tu

hai teri tamir mein muzmar wahi shan-e-wafa

teri har KHisht-e-kuhan hai jauhar-e-kan-e-wafa

ghul na kar aahista aahista ho ai jamuna rawan

taj-e-ismat ka yahan har ek dur-e-yakta nihan

ai zahe shaukat teri jamuna zahe ezaz-o-shan

tujh pe lahraya kiya islam ka sadiyon nishan

hae wo turkon ke daste aur sanginon ki shan

tirchhe-banke wo jawan wo chaar aainon ki shan

be-sada zer-e-zamin hai bazm-e-shahan-e-ghayur

aah jamuna tujh mein lekin hai wahi shan-e-ghurur

aah o shikwa-taraaz-e-dast bedad-e-ajal

ro na KHun-e-arzu o mahw-e-fariyaad-e-ajal

aah is dar-e-fana mein hai baqa kis ke liye

chhoDne wala hai shahin-e-qaza kis ke liye

aah us KHwab-e-shabana ka hai mujh ko intizar

us surur-e-ashiqana ka hai mujh ko intizar

teri ek ek mauj thi jab aah tufan-kosh-e-shauq

halqa-e-girdab tha jab haala-e-aghosh-e-shauq

jab kisi ke gesu-e-pur-KHam ki saudai thi tu

aur lab-e-sahil pe rauza ki tamashai thi tu

aah jamuna tujh ko daur-e-pastani ki qasam

shaukat-e-derina-e-sahib-qirani ki qasam

kya na honge tujh ko wo dilkash manazir phir nasib

azmat-e-islam ke agle mazahir phir nasib

ho ke muztar aah josh-e-iztirab-e-dil se kya

yunhi Takraya karegi sar ko tu sahil se kya

kaun ye parda-nashin hai tere daman mein nihan

kis ka chehra hai naqab-e-zulf-e-pur-fan mein nihan

teri maujon mein hai ye kis ki sada-e-dil-fareb

ga rahi hai kaun ye ghaarat-gar-e-sabr-o-shakeb

KHana-e-dil mein hai tere kaun mahw-e-raqs-e-naz

aa rahi hai kis ki chhagal ki sada-e-jaan-nawaz

wo saman-andam hai ye shahid-e-parda-nashin

jis ke phulon mein hai ab tak bu-e-firdaus-e-barin

huren aa kar KHuld se tauf-e-mazar-e-pak ko

jhaDti palkon se hain gard-o-KHas-o-KHashak ko

aah ai naqsh-e-nigar-e-shaukat-e-ahd-e-kuhan

aah ai aaina-dar-e-shaukat-e-ahd-e-kuhan

hum ne nana tujh mein ab wo shan-e-barnai nahin

wo ghurur-e-husn wo tamkin wo ranai nahin

hum ne mana tere chehre ki ziya jati rahi

teri maujon ki wo mastana ada jati rahi

munh pe gumnami ka aanchal le na ai parda-nashin

yun hi sargarm-e-KHiram-e-naz rah ai naznin

sar ko Takraya kare sahil se sail-e-rozgar

teri shohrat ke nishan sadiyon rahenge yaadgar