touch screen

maiñ apnī shā.irī

ik diary meñ note kartā thā

koī ehsās mujh meñ nazm bhartā

yā koī misra utartā thā

to sab se pahle mujh ko

note-bōk darkār hotī thī

jahāñ kāġhaz kī hiddat se

qalam kī raushnā.ī kī harārat se

ġhazal tayyār hotī thī

binā is dhīmī dhīmī aañch ke

mere liye har nazm hī dushvār hotī thī

phir ik din mujh ko chāchā-zād bhaa.ī ne ye batlāyā

vo ḳhud bhī naujavāñ urdu kā shā.ir hai

vo apnī shā.irī cell-phone meñ mahfūz kartā hai

so jab chāhe use paḌhtā hai

auroñ se share karke unheñ mahzūz kartā hai

use bijlī ke aane jaane se

kuchh farq paḌtā hī nahīñ

na hī use din raat se kuchh lenā denā hai

use jab shā.irī karnī ho

to kāġhaz qalam kī khoj meñ

lamha talak zaa.e.a nahīñ kartā

jahāñ vo sher apnā note kartā hai

añdherā bhī vahāñ saaya nahīñ kartā

so us kī baat sun kar

maiñ ne apnī Diary sambhāl lī

aur apne mobile meñ misra likhte likhte

dost kī ik kaal lī

phir kaal ghanToñ tak chalī

be-kār kī ḳhvāhish vo misra puurā karne kī

mere andar palī

lekin vo phir jaatī rahī

phir yuuñ huā jab bhī koī ilhām

mere dar ko khaTkātā rahā

jab kaifiyat koī mere ehsās tak aatī rahī

maiñ us samay

cell-phone ko DhūñDā kiyā

lekin vahāñ ehsās ko ik rabt meñ

tahrīr kar paane se pahle

bīsoñ be-rabt behis notifications

merī scrēn par zāhir hue

aur ham hamesha ke liye kuchh likhne se qāsir hue

gum ho ga.e in be-hisoñ kī fauj meñ

aa.ī na merī shā.irī phir mauj meñ

ab sochtā huuñ kyā purānī diary behtar nahīñ

dīvān merā phone ke andar nahīñ

touch scrēn ke us paar hai

shāyad mere alfāz kī yak-bastagī ko

sirf kāġhaz kī tapish darkār hai

main apni shairi

ek diary mein note karta tha

koi ehsas mujh mein nazm bharta

ya koi misra utarta tha

to sab se pahle mujh ko

note-book darkar hoti thi

jahan kaghaz ki hiddat se

qalam ki raushnai ki hararat se

ghazal tayyar hoti thi

bina is dhimi dhimi aanch ke

mere liye har nazm hi dushwar hoti thi

phir ek din mujh ko chacha-zad bhai ne ye batlaya

wo KHud bhi naujawan urdu ka shair hai

wo apni shairi cell-phone mein mahfuz karta hai

so jab chahe use paDhta hai

auron se share karke unhen mahzuz karta hai

use bijli ke aane jaane se

kuchh farq paDta hi nahin

na hi use din raat se kuchh lena dena hai

use jab shairi karni ho

to kaghaz qalam ki khoj mein

lamha talak zaea nahin karta

jahan wo sher apna note karta hai

andhera bhi wahan saya nahin karta

so us ki baat sun kar

main ne apni Diary sambhaal li

aur apne mobile mein misra likhte likhte

dost ki ek kal li

phir kal ghanTon tak chali

be-kar ki KHwahish wo misra pura karne ki

mere andar pali

lekin wo phir jati rahi

phir yun hua jab bhi koi ilham

mere dar ko khaTkata raha

jab kaifiyat koi mere ehsas tak aati rahi

main us samay

cell-phone ko DhunDa kiya

lekin wahan ehsas ko ek rabt mein

tahrir kar pane se pahle

bison be-rabt behis notifications

meri screen par zahir hue

aur hum hamesha ke liye kuchh likhne se qasir hue

gum ho gae in be-hison ki fauj mein

aai na meri shairi phir mauj mein

ab sochta hun kya purani diary behtar nahin

diwan mera phone ke andar nahin

touch screen ke us par hai

shayad mere alfaz ki yak-bastagi ko

sirf kaghaz ki tapish darkar hai