tulua

kise yaqīñ thā ki palTegī raat kī kaayā

kaTī to raat magar ek ek pal gin gin

ufuq pe aa.ī bhī thī surḳhi-e-sahar lekin

sahar ke saath hī abr-e-siyāh bhī aayā

sahar ke saath hī hadd-e-nigāh tak chhāyā

ye kyā ġhazab hai ki ab tīra-tar hai raat se din

zamāna shoḳh shuāo udaas hai tum bin

bas ik jhalak ki uThe sar se ye ghanā saayā

ye Dar bhī hai ki shuā.eñ na jagmagā uTTheñ

koī shuā.a jo uThī bhī le ke añgḌā.ī

aur uTh ke ālam-e-tārīk meñ vo dar aa.ī

tū aa ke dekhegī hai nūr-o-be-basar āñkheñ

nahīñ hai jan ke liye farq nūr-o-zulmat meñ

ki ab haiñ ḳhvāb-e-adam meñ sahar ke saudā.ī

kise yaqin tha ki palTegi raat ki kaya

kaTi to raat magar ek ek pal gin gin

ufuq pe aai bhi thi surKHi-e-sahar lekin

sahar ke sath hi abr-e-siyah bhi aaya

sahar ke sath hi hadd-e-nigah tak chhaya

ye kya ghazab hai ki ab tira-tar hai raat se din

zamana shoKH shuao udas hai tum bin

bas ek jhalak ki uThe sar se ye ghana saya

ye Dar bhi hai ki shuaen na jagmaga uTThen

koi shuaa jo uThi bhi le ke angDai

aur uTh ke aalam-e-tarik mein wo dar aai

tu aa ke dekhegi hai nur-o-be-basar aankhen

nahin hai jan ke liye farq nur-o-zulmat mein

ki ab hain KHwab-e-adam mein sahar ke saudai