tum agar rukte

rail guzrī

dandanātī

chīḳh barmātī

ik humaktā muskurātā phuul thāme

haath kī halkī sī jumbish

(salām āḳhirī)

chāquoñ kī dhaar peshānī meñ dhañs kar rah ga.ī

roz o shab ma.amūl ke sab sā.ebānoñ meñ darāḌeñ paḌ ga.iiñ

phan uThā.e pTriyoñ ke naag bal khāne lage

surḳh añgāre bujhe

sabz zahrī jhanDiyāñ lahrā ga.iiñ

khaultā jaltā lahū jamne lagā

os ummīdoñ pe jaise paḌ ga.ī

tez-rau pahiye mire siine se guzre

aur hamesha ke liye jaise signal gir gayā

yaad kī andhī surañgī aañkh

ab ik raushnī kā dā.era thā

chilchilātī raushnī

jaise īñdhan biis barsoñ kā yakāyak jal uThe

tum agar rukte

to meñ is raushnī ke dā.ere ko thaam letā

āhanī bhaTTī meñ apnā sab asāsa jhoñk detā

aur ham is raushnī meñ

apnī tahrīroñ ke vo alfāz paḌh lete

jo merī lauh par mahfūz haiñ

ek katbe kī tarah se aaj bhī mahfūz haiñ

tum agar rukte

to maiñ tum ko dikhātā

al-vidā.ī sīTiyoñ kī chīḳh sun kar

har taraf mahshar bapā hai

mere andar marne vaalā hai

ek aalam jaag uThā hai

kis qayāmat kī ghaḌī hai

tum agar rukte

to maiñ iqbāl kartā

apne hāthoñ āp-apne qatl kā iqbāl kartā

tum agar rukte!

rail guzri

dandanati

chiKH barmati

ek humakta muskuraata phul thame

hath ki halki si jumbish

(salam aaKHiri)

chaquon ki dhaar peshani mein dhans kar rah gai

roz o shab mamul ke sab saebanon mein daraDen paD gain

phan uThae pTriyon ke nag bal khane lage

surKH angare bujhe

sabz zahri jhanDiyan lahra gain

khaulta jalta lahu jamne laga

os ummidon pe jaise paD gai

tez-rau pahiye mere sine se guzre

aur hamesha ke liye jaise signal gir gaya

yaad ki andhi surangi aankh

ab ek raushni ka daera tha

chilchilati raushni

jaise indhan bis barson ka yakayak jal uThe

tum agar rukte

to mein is raushni ke daere ko tham leta

aahani bhaTTi mein apna sab asasa jhonk deta

aur hum is raushni mein

apni tahriron ke wo alfaz paDh lete

jo meri lauh par mahfuz hain

ek katbe ki tarah se aaj bhi mahfuz hain

tum agar rukte

to main tum ko dikhata

al-widai siTiyon ki chiKH sun kar

har taraf mahshar bapa hai

mere andar marne wala hai

ek aalam jag uTha hai

kis qayamat ki ghaDi hai

tum agar rukte

to main iqbaal karta

apne hathon aap-apne qatl ka iqbaal karta

tum agar rukte!