tum aur hum

tum badan kī sat.h ke tairāk banñā chāhte the

tum the nazzāroñ ke sāhil par tamāsha-bīn aur shauqīn

tum pahuñchnā chāhte the pairahan ke paar

jild tak mahdūd thā zauq-e-jamāl

gosht thā maqsūd-e-parvāz-e-ḳhayāl

inkishāf-e-jism thā afkār-e-ālī kā kamāl

dāman o band-e-qabā añgiyā dupaTTe pā.inche

the tumhārī shā.erī ke mashġhale

aur tumhāre mas.ale aur marhale

aur ham haiñ ruuh kī ehsās kī gahrā.iyoñ ke ġhota-ḳhor

zindagī meñ aur ham meñ raaz ab utne nahīñ

zindagī kyā aur duniyā kyā hamāre sāmne haiñ be-hijāb

jild kyā aur gosht kyā aur jism kyā

x-ray scrēn par haiñ haDDiyāñ tak be-libās

bār-hā dekhī huī chīzoñ ko phir se dekhnā

bār-hā bhogī huī chīzoñ ko phir se bhognā

bhog kar ḳhush honā khuḌhnā, tilmilānā sochnā

sochnā aur soch ke kāran ko pīchhe chhoḌ kar

nāpte phirnā azal se tā-abad

soch kā sahrā-e-nā-paidā-kanār

ārzū-e-dīd ke shāloñ meñ tum chalte rahe

diid ke sho.aloñ meñ ham lipTe hue haiñ

tum parā.ī aag meñ jalte rahe

aur ham jalte haiñ apnī aag meñ

aur ab apne parā.e meñ kahāñ hai koī bhed

ek hī ākāsh apne bāzuoñ meñ bheñchtā hai

ek taḳht-al-arz chashma sab jaḌoñ ko sīñchtā hai

ek hī sho.ala nasoñ ko khīñchtā hai

tum badan ki sath ke tairak banna chahte the

tum the nazzaron ke sahil par tamasha-bin aur shauqin

tum pahunchna chahte the pairahan ke par

jild tak mahdud tha zauq-e-jamal

gosht tha maqsud-e-parwaz-e-KHayal

inkishaf-e-jism tha afkar-e-ali ka kamal

daman o band-e-qaba angiya dupaTTe painche

the tumhaari shaeri ke mashghale

aur tumhaare masale aur marhale

aur hum hain ruh ki ehsas ki gahraiyon ke ghota-KHor

zindagi mein aur hum mein raaz ab utne nahin

zindagi kya aur duniya kya hamare samne hain be-hijab

jild kya aur gosht kya aur jism kya

x-ray screen par hain haDDiyan tak be-libas

bar-ha dekhi hui chizon ko phir se dekhna

bar-ha bhogi hui chizon ko phir se bhogna

bhog kar KHush hona khuDhna, tilmilana sochna

sochna aur soch ke karan ko pichhe chhoD kar

napte phirna azal se ta-abad

soch ka sahra-e-na-paida-kanar

aarzu-e-did ke shaalon mein tum chalte rahe

did ke shoalon mein hum lipTe hue hain

tum parai aag mein jalte rahe

aur hum jalte hain apni aag mein

aur ab apne parae mein kahan hai koi bhed

ek hi aakash apne bazuon mein bhenchta hai

ek taKHt-al-arz chashma sab jaDon ko sinchta hai

ek hi shoala nason ko khinchta hai