tum kaho to kahun

harf ke taar meñ jitne aañsū piro.e ga.e

dard un se fuzūñ thā

suno to kahūñ

tum kaho to kahūñ zarf kī dāstāñ

ketiyoñ ko gila bādaloñ se nahīñ sūrajoñ se bhī thā

bāzūoñ se bhī thā hal pakaḌne se pahle hī jo thak ga.e

kisht-e-zar-ḳhez par āb-e-namkīn jam sā gayā

raqs tham sā gayā

eḌiyāñ ghūmte ghūmte ruk ga.iiñ

ashk ruḳhsār kī ghāTiyoñ se girā munjamid ho gayā

rañg ḳhushbū banā to havā chal paḌī

ḳhvāb naata banā to khulī khiḌkiyoñ meñ salāḳheñ ugiiñ

haath zaḳhmī hue

kis ke kashkol se kitne sikke gire

hijr kaisā parinde kī āñkhoñ meñ thā

ghaav kaise pahāḌoñ ke siine pe the

aa.ina guñg thā

farsh par aks dham se girā

kirchiyāñ ho gayā

tum kaho to ginūñ

tum kaho to chunūñ

tum kaho to sunūñ in khule phuul kī dhaḌkaneñ

gum-shuda titliyoñ kī sadā

zard Tahnī ke hoñToñ pe rakkhī huī bad-duā

āsmānoñ kī dahlīz par pheñk duuñ

tum kaho to dikhā.ūñ tumheñ

ik tamāsha ki jo merī muTThī meñ hai

ek gardan ki jo ġham ke phande meñ hai

saañs chaltī bhī hai aur chaltī nahīñ

jaañ nikaltī nahīñ

harf ke tar mein jitne aansu piroe gae

dard un se fuzun tha

suno to kahun

tum kaho to kahun zarf ki dastan

ketiyon ko gila baadalon se nahin surajon se bhi tha

bazuon se bhi tha hal pakaDne se pahle hi jo thak gae

kisht-e-zar-KHez par aab-e-namkin jam sa gaya

raqs tham sa gaya

eDiyan ghumte ghumte ruk gain

ashk ruKHsar ki ghaTiyon se gira munjamid ho gaya

rang KHushbu bana to hawa chal paDi

KHwab nata bana to khuli khiDkiyon mein salaKHen ugin

hath zaKHmi hue

kis ke kashkol se kitne sikke gire

hijr kaisa parinde ki aankhon mein tha

ghaw kaise pahaDon ke sine pe the

aaina gung tha

farsh par aks dham se gira

kirchiyan ho gaya

tum kaho to ginun

tum kaho to chunun

tum kaho to sunun in khule phul ki dhaDkanen

gum-shuda titliyon ki sada

zard Tahni ke honTon pe rakkhi hui bad-dua

aasmanon ki dahliz par phenk dun

tum kaho to dikhaun tumhein

ek tamasha ki jo meri muTThi mein hai

ek gardan ki jo gham ke phande mein hai

sans chalti bhi hai aur chalti nahin

jaan nikalti nahin