tum kahte ho

log nahīñ kahte

ki tum nahīñ dekh sakte

āñkhoñ kī bosīda shāḳhoñ se phūTtī haryāval

log nahīñ kahte

ki tum nahīñ sun sakte

tārīkī kā sarmast giit

log nahīñ kahte

ki tum nahīñ chakh sakte

zabān meñ jāgte māvarā.ī zā.iqe

log nahīñ kahte

ki tum nahīñ sūñgh sakte

bosoñ meñ mahaktī halāvat

log nahīñ kahte

ki tum nahīñ chhū sakte

lahaktī havā kā badan

log nahīñ kahte

kuchh bhī nahīñ kahte

bas vo vahī sunñā chāhte haiñ

jo tum kahte ho

vo sunte haiñ aur

tum aur bhī sarpaT bhāgne lagte ho

na.ī kahāniyoñ kī bū sūñghte

pārsā.ī ke Dhol kī thaap par

nāchte nāchte

tum samāñ bāñdh sakte ho

magar kaun dekhtā hai

log to kab ke samā.at meñ Dhal chuke

sirf tumhārā dahāna khulā hai

mastūr mohabbatoñ ke raaz ugalte ugalte

tum zabān se Tapaktī raal poñchhnā bhuul ga.e ho

bāchhoñ se kaf uḌāte uḌāte

rānoñ ke beach dam toḌtī ḳhvāhishoñ kī gor-kanī tumhārā muqaddar ho ga.ī hai

dekh sakte ho to dekho

kahāniyoñ ke qadmoñ kī raftār meñ

koī farq nahīñ aayā

log nahin kahte

ki tum nahin dekh sakte

aankhon ki bosida shaKHon se phuTti haryawal

log nahin kahte

ki tum nahin sun sakte

tariki ka sarmast git

log nahin kahte

ki tum nahin chakh sakte

zaban mein jagte mawarai zaiqe

log nahin kahte

ki tum nahin sungh sakte

boson mein mahakti halawat

log nahin kahte

ki tum nahin chhu sakte

lahakti hawa ka badan

log nahin kahte

kuchh bhi nahin kahte

bas wo wahi sunna chahte hain

jo tum kahte ho

wo sunte hain aur

tum aur bhi sarpaT bhagne lagte ho

nai kahaniyon ki bu sunghte

parsai ke Dhol ki thap par

nachte nachte

tum saman bandh sakte ho

magar kaun dekhta hai

log to kab ke samaat mein Dhal chuke

sirf tumhaara dahana khula hai

mastur mohabbaton ke raaz ugalte ugalte

tum zaban se Tapakti ral ponchhna bhul gae ho

bachhon se kaf uDate uDate

ranon ke beach dam toDti KHwahishon ki gor-kani tumhaara muqaddar ho gai hai

dekh sakte ho to dekho

kahaniyon ke qadmon ki raftar mein

koi farq nahin aaya