tumhaara kya hai

tumhārā kyā hai ki tum hazāroñ diloñ kī dhaḌkan

tumhārā kyā hai

ki ik ishāre pe phuul kaliyāñ tumhāre qadmoñ meñ aa gire haiñ

na jaane kitnī hī sar-zamīnoñ ke tum falak ho

na jaane kitne hī tishna jismoñ kā chain ho tum

hamārā kyā hai

ki nā-rasā.ī kī dāstāñ kā bane haiñ unvāñ

hamārā kyā hai

ki umr saarī bitā.ī ham ne to vahshatoñ meñ

ki tum se vābasta ho ke ham ne jo dard paayā

vo dard chehre kī malgajī rut kā isti.āra banā huā hai

ye dard vo hai jo bāqī-māñda hayāt kā aasrā banā hai

ye dard vo hai jo aane vaalī kisī bhī saa.at meñ raushnī kā naqīb hogā

ki ham to vo haiñ

tumhārī yādoñ kī sho.alagī meñ jalā ke ḳhud ko

hai sabr karnā

andher-nagrī meñ jabr karnā

hai ab bhī baaqī

tumhaara kya hai ki tum hazaron dilon ki dhaDkan

tumhaara kya hai

ki ek ishaare pe phul kaliyan tumhaare qadmon mein aa gire hain

na jaane kitni hi sar-zaminon ke tum falak ho

na jaane kitne hi tishna jismon ka chain ho tum

hamara kya hai

ki na-rasai ki dastan ka bane hain unwan

hamara kya hai

ki umr sari bitai hum ne to wahshaton mein

ki tum se wabasta ho ke hum ne jo dard paya

wo dard chehre ki malgaji rut ka istiara bana hua hai

ye dard wo hai jo baqi-manda hayat ka aasra bana hai

ye dard wo hai jo aane wali kisi bhi saat mein raushni ka naqib hoga

ki hum to wo hain

tumhaari yaadon ki shoalagi mein jala ke KHud ko

hai sabr karna

andher-nagri mein jabr karna

hai ab bhi baqi