tumhaara shukriya

vo lamhe jab

vajūd meñ bārūd bhar jaatā hai

soch kahtī hai ki

har shai fanā ho saktī hai

mahz zabān se phisle lafz

andar ke ḳhālī-pan ko

musallat kar deñ

aisā ḳhālī-pan

qubūl karne meñ dushvārī hotī hai

tumhārā shukriya

darāñtī kī nok der tak

kachchī zamīn ko kuredtī rahī

aur us meñ se ḳhuun na niklā

tahoñ ke nīche fasleñ ugtī rahī hoñgī

kisī ko kyā ḳhabar hotī hai

be-ḳhabarī kī buniyād par

duniyā ābād hotī hai

aadmī ke sivā baaqī har shai

apnī mauzūīyat ke mārūz se

vāqif rahtī hai

tumhārā shukriya

hamāre is qusūr ke liye ki

māvarā kī pur-kaif fazā

mohabbat ke gird lipTī rahtī hai

aur pathrīlī zamīn kī kashish

hameñ dukh detī rahtī hai

tumhāre binā

tasavvur se rishta nahīñ juḌtā

dukh kī uñgliyāñ

hoñToñ par nahīñ bajtīñ

rāstoñ ke

TeḌhe aur sīdhe-pan meñ kho.e aadmī par

farāmosh ḳhabreñ ilqā hotī haiñ

tumhārā shukriya

ret ThanDī rahtī hai

yahāñ tak ki andar khīñch letī hai

aur zarrāt popcorn kī mānind

uchhal kuud karte haiñ

ek haath mohabbat bharā

bāloñ ko chhūtā hai

ye dhanak bharā jazba dhañsātā hai

apne bojh se

ḳhabroñ kī bārish se

mohabbat dukh aur dard kī

kah dene se

ye sab kah dene se

rāstoñ ke sīdhe aur TeḌhe-pan jaisā

ḳhālī-pan musallat hotā hai

is qusūr ke liye

ki ham use qubūl kar lete haiñ

wo lamhe jab

wajud mein barud bhar jata hai

soch kahti hai ki

har shai fana ho sakti hai

mahz zaban se phisle lafz

andar ke KHali-pan ko

musallat kar den

aisa KHali-pan

qubul karne mein dushwari hoti hai

tumhaara shukriya

daranti ki nok der tak

kachchi zamin ko kuredti rahi

aur us mein se KHun na nikla

tahon ke niche faslen ugti rahi hongi

kisi ko kya KHabar hoti hai

be-KHabari ki buniyaad par

duniya aabaad hoti hai

aadmi ke siwa baqi har shai

apni mauzuiyat ke maruz se

waqif rahti hai

tumhaara shukriya

hamare is qusur ke liye ki

mawara ki pur-kaif faza

mohabbat ke gird lipTi rahti hai

aur pathrili zamin ki kashish

hamein dukh deti rahti hai

tumhaare bina

tasawwur se rishta nahin juDta

dukh ki ungliyan

honTon par nahin bajtin

raston ke

TeDhe aur sidhe-pan mein khoe aadmi par

faramosh KHabren ilqa hoti hain

tumhaara shukriya

ret ThanDi rahti hai

yahan tak ki andar khinch leti hai

aur zarraat popcorn ki manind

uchhal kud karte hain

ek hath mohabbat bhara

baalon ko chhuta hai

ye dhanak bhara jazba dhansata hai

apne bojh se

KHabron ki barish se

mohabbat dukh aur dard ki

kah dene se

ye sab kah dene se

raston ke sidhe aur TeDhe-pan jaisa

KHali-pan musallat hota hai

is qusur ke liye

ki hum use qubul kar lete hain