tumhaari aankhen

tumhārī āñkheñ

tumhārī kaalī chamaktī āñkheñ

zamāne ke sāgar meñ

do ābnūsī kashtiyāñ

jin kī tah meñ

taare jaḌe hue haiñ

palkoñ ke mastūl thartharāte haiñ

har ghaḌī har dam

hiltī Doltī bahtī chalī jā rahī haiñ

mat roko in ko

inheñ lambe dūr-darāz safar karne do

dukh kī tilmilātī lahroñ

āñsūoñ ke bhañvar meñ

phañsne do in ko

aur inheñ phir

nit-na.ī anjānī āshāoñ ke

sunahre sāhiloñ se

Takrāne do

aise vaisoñ ke paas inheñ le jaao

jahāñ ḳhushiyoñ ke hiire

patthar ke saath mile-jule

chatiyal maidānoñ meñ

bikhre paḌe hue haiñ

aur jahāñ ūñchī nokīlī saḳht

chaTānoñ ke siine

chiir kar

nāzuk nāyāb mahakte phuul nikal aa.e haiñ

guzarne do

in maTiyāle bhūre sāyoñ ke

nīche se un ko

jo dil ko Thahrā dete haiñ

aur un āsmānī niilī

raushniyoñ kī halkī maddham zau

paḌne do in par

jin se

man ke sab añdhiyāre

dhul jaate haiñ

āzād rakho

apnī in achchhī āñkhoñ ko āzād

barkhā meñ bādal

sahrā meñ aahū

ban meñ jaise mor papīhe hoñ

phir ye tumhārī

kaalī āñkheñ

ābnūs kī do mahaktī bahaktī kashtiyāñ

indr-dhanush ke

sātoñ rañgoñ se bhar jā.eñgī

aur ham tum se pūchheñge

batāo

ye do āñkheñ tumhārī

hameñ kyoñ itnī achchhī lagtī haiñ

tumhaari aankhen

tumhaari kali chamakti aankhen

zamane ke sagar mein

do aabnusi kashtiyan

jin ki tah mein

tare jaDe hue hain

palkon ke mastul thartharaate hain

har ghaDi har dam

hilti Dolti bahti chali ja rahi hain

mat roko in ko

inhen lambe dur-daraaz safar karne do

dukh ki tilmilati lahron

aansuon ke bhanwar mein

phansne do in ko

aur inhen phir

nit-nai anjaani aashaon ke

sunahre sahilon se

Takrane do

aise waison ke pas inhen le jao

jahan KHushiyon ke hire

patthar ke sath mile-jule

chatiyal maidanon mein

bikhre paDe hue hain

aur jahan unchi nokili saKHt

chaTanon ke sine

chir kar

nazuk nayab mahakte phul nikal aae hain

guzarne do

in maTiyale bhure sayon ke

niche se un ko

jo dil ko Thahra dete hain

aur un aasmani nili

raushniyon ki halki maddham zau

paDne do in par

jin se

man ke sab andhiyare

dhul jate hain

aazad rakho

apni in achchhi aankhon ko aazad

barkha mein baadal

sahra mein aahu

ban mein jaise mor papihe hon

phir ye tumhaari

kali aankhen

aabnus ki do mahakti bahakti kashtiyan

indr-dhanush ke

saton rangon se bhar jaengi

aur hum tum se puchhenge

batao

ye do aankhen tumhaari

hamein kyon itni achchhi lagti hain