tumhein aazad karti hun

suno koī uzr mat DhūñDo na hī nazreñ churāo tum

mujhe mālūm hai maiñ sab samajhtī huuñ

tumhāre ahd-e-ulfat se tumheñ āzād kartī huuñ

ab aisā hai ki patthar kā zamāna phir se lauT aayā

vahī qānūn jangal kā jibillat kā ġhulām insāñ

farāz-e-ishq se pātāl tak kā hai safar ya.anī

firāq-o-hijr ke mausam hue pārīna qisse ab

ba-kasrat haiñ mayassar ab to māshūqān-e-shīrīñ-lab

maiñ huuñ hairat-zada ab tak

vo kaise log the āḳhir

lahū se kar ga.e rangīn jo ulfat ke qissoñ ko

ajab hī rah nikālī thī

vafā kī rasm Daalī thī

maiñ qissa-go abhī tak dāstānoñ meñ hī rahtī huuñ

vahī rasmeñ nibhātī huuñ vahī dukh dard sahtī huuñ

magar maiñ ahd-e-hāzir ke ravayyoñ se bhī vāqif huuñ

suno koī uzr mat DhūñDo na hī nazreñ churāo tum

mujhe mālūm hai maiñ sab samajhtī huuñ

tumhāre ahd-e-ulfat se tumheñ āzād kartī huuñ

suno koi uzr mat DhunDo na hi nazren churao tum

mujhe malum hai main sab samajhti hun

tumhaare ahd-e-ulfat se tumhein aazad karti hun

ab aisa hai ki patthar ka zamana phir se lauT aaya

wahi qanun jangal ka jibillat ka ghulam insan

faraaz-e-ishq se patal tak ka hai safar yani

firaq-o-hijr ke mausam hue parina qisse ab

ba-kasrat hain mayassar ab to mashuqan-e-shirin-lab

main hun hairat-zada ab tak

wo kaise log the aaKHir

lahu se kar gae rangin jo ulfat ke qisson ko

ajab hi rah nikali thi

wafa ki rasm Dali thi

main qissa-go abhi tak dastanon mein hi rahti hun

wahi rasmen nibhati hun wahi dukh dard sahti hun

magar main ahd-e-hazir ke rawayyon se bhi waqif hun

suno koi uzr mat DhunDo na hi nazren churao tum

mujhe malum hai main sab samajhti hun

tumhaare ahd-e-ulfat se tumhein aazad karti hun