tumhein yaad ho ki na yaad ho

vo jahān-e-shauq kī bastiyāñ

vo sharāb-e-ishq kī mastiyāñ

vo harīm-e-nāz kī rif.ateñ

vo sar-e-niyāz kī pastiyāñ

vo sukūt-e-manzar-e-jū-e-āb

vo ḳhamosh jalva-e-māhtāb

vo niyāz-o-nāz kī mahfileñ

vo sukūñ-navāzī-e-iztirāb

vo javāniyoñ meñ sharārateñ

vo tabī.atoñ meñ harārateñ

vo nafas meñ ziist kī garmiyāñ

vo navā-e-dil meñ bashārateñ

vo ḳhamoshiyoñ meñ hikāyateñ

vo dabī zabāñ se shikāyateñ

vo hijāb-e-jalva-e-ārzū

vo hadīs-e-dil kī nazākateñ

vo ḳhutūt aur vo guzārisheñ

vo maze maze kī nigārisheñ

vo ġhurūr-e-husn kī narmiyāñ

vo nigāh-e-lutf kī bārisheñ

kaf-e-nāznīñ meñ vo jām-e-mai

vo surūr-e-sāġhar-e-pai-ba-pai

vo nigāh-e-mast kī gardisheñ

vo nazar-farosh har ek shai

mirī aañkh ashk-fishāñ na thī

mire lab pe āh-o-fuġhāñ na thī

mire valvaloñ meñ shabāb thā

mujhe koī fikr-e-jahāñ na thī

kabhī lutf aur kabhī sitam

kabhī ishrat aur kabhī alam

kabhī bazm-e-aish meñ qahqahe

kabhī josh-e-girya se chashm nam

kabhī mujh se tum ko bhī chaah thī

kabhī mujh pe bhī to nigāh thī

mirā haal yuuñ na udaas thā

mirī ziist yuuñ na tabāh thī

vo zamāna mujh ko to yaad hai

tumheñ yaad ho ki na yaad ho

wo jahan-e-shauq ki bastiyan

wo sharab-e-ishq ki mastiyan

wo harim-e-naz ki rifaten

wo sar-e-niyaz ki pastiyan

wo sukut-e-manzar-e-ju-e-ab

wo KHamosh jalwa-e-mahtab

wo niyaz-o-naz ki mahfilen

wo sukun-nawazi-e-iztirab

wo jawaniyon mein shararaten

wo tabiaton mein hararaten

wo nafas mein zist ki garmiyan

wo nawa-e-dil mein bashaaraten

wo KHamoshiyon mein hikayaten

wo dabi zaban se shikayaten

wo hijab-e-jalwa-e-arzu

wo hadis-e-dil ki nazakaten

wo KHutut aur wo guzarishen

wo maze maze ki nigarishen

wo ghurur-e-husn ki narmiyan

wo nigah-e-lutf ki barishen

kaf-e-naznin mein wo jam-e-mai

wo surur-e-saghar-e-pai-ba-pai

wo nigah-e-mast ki gardishen

wo nazar-farosh har ek shai

meri aankh ashk-fishan na thi

mere lab pe aah-o-fughan na thi

mere walwalon mein shabab tha

mujhe koi fikr-e-jahan na thi

kabhi lutf aur kabhi sitam

kabhi ishrat aur kabhi alam

kabhi bazm-e-aish mein qahqahe

kabhi josh-e-girya se chashm nam

kabhi mujh se tum ko bhi chah thi

kabhi mujh pe bhi to nigah thi

mera haal yun na udas tha

meri zist yun na tabah thi

wo zamana mujh ko to yaad hai

tumhein yaad ho ki na yaad ho