Typist

din Dhalā jaatā hai Dhal jā.egā kho jā.egā

reg-aTī darz se dar aa.ī hai ik zard kiran

dekh kar mez ko dīvār ko almārī ko

filoñ, kāġhazoñ, bikhrī huī tahrīroñ ko

phir usī darz se ghabrā ke nikal jā.egī

aur bāhar vo bhalī dhūp, sunahrī kirneñ

jo kabhī abr ke āġhosh meñ chhup jaatī haiñ

kabhī peḌoñ ke ḳhunuk sāyoñ meñ lahrā.ī haiñ

paas hī peḌ pe hudhud kī khaTā-khaT khaT-khaT

aur niDhāl uñgliyāñ kahtī haiñ thakā-thak thak-thak

mahz abjad kī badaltī huī be-his tartīb

lafz hī lafz pe ehsās na armāñ koī

aur armān vo bhaTke hue raahī jin ke

saath saath aate hue bhuut kī sūrat ḳhadshe

sard hāthoñ se kabhī paañv jakaḌ lete haiñ

aur kabhī āhanī dīvār uThā dete haiñ

maiñ ne dekhā hai kahīñ ghir ke jab aa.e bādal

chīḳh uThe log ki ab khetiyāñ lahrā.eñgī

maiñ ne dekhe haiñ tamannāoñ ke banjar anjām

kis tavaqqo.a pe sañvarne lagī phir sochtī shaam

kis kī āñkhoñ kī chamak rāsta dikhlātī hai

phir vahī qumquma-e-shab kī tarah ḳhanda-e-lab

kahe jaatā hai: chalī aao, chalī bhī aao

lekin is ḳhanda ke us paar vahī pul kī talab

''yūñ to maiñ sirf tumhārā huuñ magar kyā kiije

ba.az majbūriyāñ....'' majbūriyāñ! maiñ jāntī huuñ

jāntī huuñ ki ga.e vaqt ko kis ne rokā

vaqt aatā hai guzar jaatā hai bas duur hī duur

ek din vaqt baḌe chain se so jā.egā

din Dhalā jaatā hai Dhal jaa.e gā kho jā.egā

din Dhala jata hai Dhal jaega kho jaega

reg-aTi darz se dar aai hai ek zard kiran

dekh kar mez ko diwar ko almari ko

filon, kaghazon, bikhri hui tahriron ko

phir usi darz se ghabra ke nikal jaegi

aur bahar wo bhali dhup, sunahri kirnen

jo kabhi abr ke aaghosh mein chhup jati hain

kabhi peDon ke KHunuk sayon mein lahrai hain

pas hi peD pe hudhud ki khaTa-khaT khaT-khaT

aur niDhaal ungliyan kahti hain thaka-thak thak-thak

mahz abjad ki badalti hui be-his tartib

lafz hi lafz pe ehsas na arman koi

aur arman wo bhaTke hue rahi jin ke

sath sath aate hue bhut ki surat KHadshe

sard hathon se kabhi panw jakaD lete hain

aur kabhi aahani diwar uTha dete hain

main ne dekha hai kahin ghir ke jab aae baadal

chiKH uThe log ki ab khetiyan lahraengi

main ne dekhe hain tamannaon ke banjar anjam

kis tawaqqoa pe sanwarne lagi phir sochti sham

kis ki aankhon ki chamak rasta dikhlati hai

phir wahi qumquma-e-shab ki tarah KHanda-e-lab

kahe jata hai: chali aao, chali bhi aao

lekin is KHanda ke us par wahi pul ki talab

yun to main sirf tumhaara hun magar kya kije

baz majburiyan majburiyan! main jaanti hun

jaanti hun ki gae waqt ko kis ne roka

waqt aata hai guzar jata hai bas dur hi dur

ek din waqt baDe chain se so jaega

din Dhala jata hai Dhal jae ga kho jaega