un ka jashn-e-sal-girah

ik majma-e-rañgīñ meñ vo ghabrā.ī huī sī

baiThī hai ajab naaz se sharmā.ī huī sī

āñkhoñ meñ hayā lab pe hañsī aa.ī huī sī

hoñToñ pe fidā rūh-e-bahār-o-gul-o-nasrīñ

āñkhoñ kī chamak rū-kash-e-bazm-e-mah-o-parvīñ

pairāhan-e-zar-tār meñ ik paikar-e-sīmīñ

lahreñ sī vo letā huā ik phuul kā sehrā

sehre meñ jhamaktā huā ik chāñd sā chehrā

ik rañg sā ruḳh par kabhī halkā kabhī gahrā

har saañs meñ ehsās-e-farāvāñ kī kahānī

ḳhāmoshi-e-mahbūb meñ ik sail-e-ma.ānī

jazbāt ke tūfāñ meñ hai doshīza javānī

fitrat na.e jazbāt ke dar khol rahī hai

mīzān-e-javānī meñ use taul rahī hai

lab sākit o sāmit haiñ nazar bol rahī hai

sarshār nigāhoñ meñ hayā jhuum rahī hai

haiñ raqs meñ aflāk zamīñ ghuum rahī hai

shā.ir kī vafā baḌh ke qadam chuum rahī hai

ai tū ki tire dam se mirī zamzama-ḳhvānī

ho tujh ko mubārak ye tirī nūr-jahānī

afkār se mahfūz rahe terī javānī

chhalke tirī āñkhoñ se sharāb aur ziyāda

mahkeñ tire aariz ke gulāb aur ziyāda

allāh kare zor-e-shabāb aur ziyāda

ek majma-e-rangin mein wo ghabrai hui si

baiThi hai ajab naz se sharmai hui si

aankhon mein haya lab pe hansi aai hui si

honTon pe fida ruh-e-bahaar-o-gul-o-nasrin

aankhon ki chamak ru-kash-e-bazm-e-mah-o-parwin

pairahan-e-zar-tar mein ek paikar-e-simin

lahren si wo leta hua ek phul ka sehra

sehre mein jhamakta hua ek chand sa chehra

ek rang sa ruKH par kabhi halka kabhi gahra

har sans mein ehsas-e-farawan ki kahani

KHamoshi-e-mahbub mein ek sail-e-maani

jazbaat ke tufan mein hai doshiza jawani

fitrat nae jazbaat ke dar khol rahi hai

mizan-e-jawani mein use taul rahi hai

lab sakit o samit hain nazar bol rahi hai

sarshaar nigahon mein haya jhum rahi hai

hain raqs mein aflak zamin ghum rahi hai

shair ki wafa baDh ke qadam chum rahi hai

ai tu ki tere dam se meri zamzama-KHwani

ho tujh ko mubarak ye teri nur-jahani

afkar se mahfuz rahe teri jawani

chhalke teri aankhon se sharab aur ziyaada

mahken tere aariz ke gulab aur ziyaada

allah kare zor-e-shabab aur ziyaada