urdu zaban

kitnī mīThī zabāñ kaisī pyārī zabāñ

merī urdu zabāñ faḳhr-e-hindostāñ

is meñ rādhā ke paa.el kī jhankār hai

zulf-e-zeb-un-nisā kī bhī mahkār hai

is meñ jhāñsī kī raanī kī lalkār hai

sāz-o-naġhma ke ham-rāh talvār hai

us ke dāman meñ haiñ kitnī rangīniyāñ

merī urdu zabāñ faḳhr-e-hindostāñ

hind maatā kī beTī hai urdu zabāñ

sāñvlī chulbulī naujavāñ gul-fishāñ

hindū muslim ke iḳhlās kī dāstāñ

ittihād-o-mohabbat kā qaumī nishāñ

kyoñ ise ġhair kahtā hai nā-qadr-dāñ

merī urdu zabāñ faḳhr-e-hindostāñ

is meñ sarmastī-e-jām-e-shīrāz hai

najd kā soz hai hind kā saaz hai

apnī har-dil-azīzī meñ mumtāz hai

ahl-e-hindostāñ kī ye āvāz hai

is ko kahte haiñ sab dil-kash-o-ḳhush-bayāñ

merī urdu zabāñ faḳhr-e-hindostāñ

bolī jaatī hai kashmīr se raas tak

samjhī jaatī hai gujrāt madras tak

ġhairiyat kī nahīñ is meñ bū-bās tak

nafratoñ kā nahīñ is ko ehsās tak

ḳhaas hindostānī hai urdu zabāñ

merī urdu zabāñ faḳhr-e-hindostāñ

kah rahī hai ye bhārat se urdu zabāñ

mujh se nārāz kyoñ mādar-e-mehrbāñ

tū mirī maiñ tirī hamdam-o-rāz-dāñ

phir lagā le gale se mujhe merī maañ

'tāhira' kuchh pareshāñ hai urdu zabāñ

merī urdu zabāñ faḳhr-e-hindostāñ

kitni miThi zaban kaisi pyari zaban

meri urdu zaban faKHr-e-hindostan

is mein radha ke pael ki jhankar hai

zulf-e-zeb-un-nisa ki bhi mahkar hai

is mein jhansi ki rani ki lalkar hai

saz-o-naghma ke ham-rah talwar hai

us ke daman mein hain kitni ranginiyan

meri urdu zaban faKHr-e-hindostan

hind mata ki beTi hai urdu zaban

sanwli chulbuli naujawan gul-fishan

hindu muslim ke iKHlas ki dastan

ittihad-o-mohabbat ka qaumi nishan

kyon ise ghair kahta hai na-qadr-dan

meri urdu zaban faKHr-e-hindostan

is mein sarmasti-e-jam-e-shiraaz hai

najd ka soz hai hind ka saz hai

apni har-dil-azizi mein mumtaz hai

ahl-e-hindostan ki ye aawaz hai

is ko kahte hain sab dil-kash-o-KHush-bayan

meri urdu zaban faKHr-e-hindostan

boli jati hai kashmir se ras tak

samjhi jati hai gujraat madras tak

ghairiyat ki nahin is mein bu-bas tak

nafraton ka nahin is ko ehsas tak

KHas hindostani hai urdu zaban

meri urdu zaban faKHr-e-hindostan

kah rahi hai ye bhaarat se urdu zaban

mujh se naraaz kyon madar-e-mehrban

tu meri main teri hamdam-o-raaz-dan

phir laga le gale se mujhe meri man

'tahira' kuchh pareshan hai urdu zaban

meri urdu zaban faKHr-e-hindostan