us samne baiThi laDki se

us sāmne baiThī laḌkī se

dil chāhtā hai ik baat karūñ

vo baat ki jis kī kirnoñ se

har samt ujālā ho jaa.e

ye habs jo har sū phailā hai

ḳhushbū kā havāla ho jaa.e

us chandan mūrat laḌkī kī

mahkār hai saare kamre meñ

ḳhāmosh hai vo phir bhī us kī

chahkār hai saare kamre meñ

dil hī dil meñ dil kī bāteñ

rozāna kahtā huuñ us ko

gum-sum gum-sum hairāñ hairāñ

bas dekhtā rahtā huuñ us ko

kuchh dhīme dhīme se fiqre

hoñToñ se gurezāñ rahte haiñ

kuchh dhuñdle dhuñdle se sapne

āñkhoñ meñ pareshāñ rahte haiñ

kuchh bhole-bhāle se armāñ

bechain haiñ mere siine meñ

jis din se aisī hālat hai

ik lazzat sī hai jiine meñ

us ke rañgīn ḳhayāloñ meñ

har ḳhvāb ko chehra mil jaa.e

har lamha us kī sūrat ho

har phuul ḳhushī se khil jaa.e

na jaane kyoñ phir bhī jaise

ik pyaas hai merī āñkhoñ meñ

har ḳhvāb adhūrā rahne kā

ehsās hai merī āñkhoñ meñ

jo ḳhvāb hai palkoñ par raqsāñ

ta.abīr kiyā jaa.e kaise

jo zehn meñ ek tasavvur hai

tasvīr kiyā jaa.e kaise

ab kyoñ na is tanhā.ī ko

gulzār-e-mohabbat hī samjhūñ

un hoñToñ kī ḳhāmoshī ko

iqrār-e-mohabbat hī samjhūñ

un āñkhoñ se jugnū le kar

raushan apne din raat karūñ

us sāmne baiThī laḌkī se

dil chāhtā hai ik baat karūñ

us samne baiThi laDki se

dil chahta hai ek baat karun

wo baat ki jis ki kirnon se

har samt ujala ho jae

ye habs jo har su phaila hai

KHushbu ka hawala ho jae

us chandan murat laDki ki

mahkar hai sare kamre mein

KHamosh hai wo phir bhi us ki

chahkar hai sare kamre mein

dil hi dil mein dil ki baaten

rozana kahta hun us ko

gum-sum gum-sum hairan hairan

bas dekhta rahta hun us ko

kuchh dhime dhime se fiqre

honTon se gurezan rahte hain

kuchh dhundle dhundle se sapne

aankhon mein pareshan rahte hain

kuchh bhole-bhaale se arman

bechain hain mere sine mein

jis din se aisi haalat hai

ek lazzat si hai jine mein

us ke rangin KHayalon mein

har KHwab ko chehra mil jae

har lamha us ki surat ho

har phul KHushi se khil jae

na jaane kyon phir bhi jaise

ek pyas hai meri aankhon mein

har KHwab adhura rahne ka

ehsas hai meri aankhon mein

jo KHwab hai palkon par raqsan

tabir kiya jae kaise

jo zehn mein ek tasawwur hai

taswir kiya jae kaise

ab kyon na is tanhai ko

gulzar-e-mohabbat hi samjhun

un honTon ki KHamoshi ko

iqrar-e-mohabbat hi samjhun

un aankhon se jugnu le kar

raushan apne din raat karun

us samne baiThi laDki se

dil chahta hai ek baat karun