ustad

nek bachche dil se karte haiñ adab ustād kā

baap kī ulfat se behtar hai ġhazab ustād kā

aam logoñ kī jahālat duur karne ke liye

haq-ta.ālā ne banāyā hai sabab ustād kā

us kī barakat se jahāñ meñ phailtī haiñ nekiyāñ

kyoñ na phir ustād se raazī ho rab ustād kā

kuchh na kuchh umda sabaq detī hai us kī zindagī

ḳhulq se ḳhālī nahīñ hai koī Dhab ustād kā

jis ghaḌī nādān bachchoñ ko sikhātā hai vo ilm

chuum lete haiñ farishte aa ke lab ustād kā

bas use paḌhne-paḌhāne se hamesha kaam hai

kitnā achchhā mashġhala hai roz-o-shab ustād kā

ḳhvāh saarī umr us ke paañv dho dho kar piye

aadmī se haq adā hotā hai kab ustād kā

imtihāñ meñ hal na ho jis dam koī mushkil savāl

ḳhud pasandoñ ko patā chaltā hai tab ustād kā

shukr ke jazbāt se gardan jhukā letā huuñ maiñ

yaad aatā hai mujhe ehsān jab ustād kā

kal zamāne kī nigāhoñ meñ vo izzat pā.egā

martaba pahchān jā.egā jo ab ustād kā

us kī ālamgīr haisiyyat hai shāhoñ kī tarah

kul ajam ustād kā hai kul arab ustād kā

chal rahe haiñ aaj duniyā meñ hazāroñ mahkame

sach agar pūchho to hai ye 'faiz' sab ustād kā

nek bachche dil se karte hain adab ustad ka

bap ki ulfat se behtar hai ghazab ustad ka

aam logon ki jahaalat dur karne ke liye

haq-taala ne banaya hai sabab ustad ka

us ki barakat se jahan mein phailti hain nekiyan

kyon na phir ustad se raazi ho rab ustad ka

kuchh na kuchh umda sabaq deti hai us ki zindagi

KHulq se KHali nahin hai koi Dhab ustad ka

jis ghaDi nadan bachchon ko sikhata hai wo ilm

chum lete hain farishte aa ke lab ustad ka

bas use paDhne-paDhane se hamesha kaam hai

kitna achchha mashghala hai roz-o-shab ustad ka

KHwah sari umr us ke panw dho dho kar piye

aadmi se haq ada hota hai kab ustad ka

imtihan mein hal na ho jis dam koi mushkil sawal

KHud pasandon ko pata chalta hai tab ustad ka

shukr ke jazbaat se gardan jhuka leta hun main

yaad aata hai mujhe ehsan jab ustad ka

kal zamane ki nigahon mein wo izzat paega

martaba pahchan jaega jo ab ustad ka

us ki aalamgir haisiyyat hai shahon ki tarah

kul ajam ustad ka hai kul arab ustad ka

chal rahe hain aaj duniya mein hazaron mahkame

sach agar puchho to hai ye 'faiz' sab ustad ka