wadi-e-sindh

sindh kī vaadī pe hai kaalī ghaTā chhā.ī huī

burqa oḌhe ik dulhan baiThī hai sharmā.ī huī

muntazir bārish ke haiñ makkī ke aur shālī ke khet

tishnagī se ḳhosha kī sūrat hai murjhā.ī huī

aaj ganderbal huā hai us kā manzūr-e-nazar

us ke sar par kyā ghaTā phirtī hai mañDlā.ī huī

sindh ke naale kī aahoñ kā dhuāñ shāyad uThā

kaisī tārīkī hai sat.h-e-āb par chhā.ī huī

qāsid-e-abr aa rahā hai le ke haañ paiġhām-e-faiz

bārgāh-e-ezdī meñ kis kī shunavā.ī hui

sū-e-mashriq hai sar-e-kohsār par bārish kā zor

rahmat-e-bārī hai goyā josh par aa.ī huī

ai 'humāyūñ' faiz-e-bārish se khule Dal ke kañval

kyuuñ tire dil kī kalī hai aaj murjhā.ī huī

sindh ki wadi pe hai kali ghaTa chhai hui

burqa oDhe ek dulhan baiThi hai sharmai hui

muntazir barish ke hain makki ke aur shaali ke khet

tishnagi se KHosha ki surat hai murjhai hui

aaj ganderbal hua hai us ka manzur-e-nazar

us ke sar par kya ghaTa phirti hai manDlai hui

sindh ke nale ki aahon ka dhuan shayad uTha

kaisi tariki hai sath-e-ab par chhai hui

qasid-e-abr aa raha hai le ke han paigham-e-faiz

bargah-e-ezdi mein kis ki shunawai hui

su-e-mashriq hai sar-e-kohsar par barish ka zor

rahmat-e-bari hai goya josh par aai hui

ai 'humayun' faiz-e-barish se khule Dal ke kanwal

kyun tere dil ki kali hai aaj murjhai hui