wahima

maiñ apnā sar-burīda jism le kar chal paḌā huuñ

mire ik haath meñ sar hai

maiñ apne sar meñ huuñ yā jism meñ huuñ

kabhī maiñ sar meñ baiThā sochtā huuñ

ki maiñ be-jism rah kar

kis tarah pahchān qaa.em rakh sakūñgā

mirā honā to mere jism se hai

kabhī maiñ ḳhud ko apne jism meñ mahsūs hotā huuñ

to phir sar yaad aatā hai

magar be-sar huuñ yā be-jism huuñ

ye fikr ġhā.eb hai

kabhī sar se mire āvāz aatī hai

ki maiñ murda huuñ kyūñki jism merā mar gayā hai

magar ye jism merā boltā hai

ki maiñ zinda huuñ bas ik sar gayā hai

main apna sar-burida jism le kar chal paDa hun

mere ek hath mein sar hai

main apne sar mein hun ya jism mein hun

kabhi main sar mein baiTha sochta hun

ki main be-jism rah kar

kis tarah pahchan qaem rakh sakunga

mera hona to mere jism se hai

kabhi main KHud ko apne jism mein mahsus hota hun

to phir sar yaad aata hai

magar be-sar hun ya be-jism hun

ye fikr ghaeb hai

kabhi sar se mere aawaz aati hai

ki main murda hun kyunki jism mera mar gaya hai

magar ye jism mera bolta hai

ki main zinda hun bas ek sar gaya hai