wapsi

Dhalte sūraj kā zarfishāñ tābūt

le chale maġhribī ufuq ke kahār

aur darmāñda rahguzāroñ par

jam gayā vaqt sūrat-e-ashjār

be-karāñ be-amāñ ḳhalāoñ tak

chīḳhtī jaatī haiñ abābīleñ

parbatoñ ke muhīb chehroñ se

Dar ke ḳhāmosh ho ga.iiñ jhīleñ

har khañDar meñ haiñ bhuut mahv-e-raqs

kāsa-e-sar kī le ke qindīleñ

aur duur is fasīl-e-shām se duur

chāñd kā intizār hai tum ko

ḳhud-kushī jism-o-jāñ kī kar ke bhī

ziist kā e'tibār hai tum ko

be-nafas be-ridā-e-tār-e-hayāt

ham barahna hayūle kyā ghūmeñ

muñh khulī qabreñ ro rahī hoñgī

aao qabroñ meñ apnī lauT chaleñ

Dhalte suraj ka zarfishan tabut

le chale maghribi ufuq ke kahaar

aur darmanda rahguzaron par

jam gaya waqt surat-e-ashjar

be-karan be-aman KHalaon tak

chiKHti jati hain ababilen

parbaton ke muhib chehron se

Dar ke KHamosh ho gain jhilen

har khanDar mein hain bhut mahw-e-raqs

kasa-e-sar ki le ke qindilen

aur dur is fasil-e-sham se dur

chand ka intizar hai tum ko

KHud-kushi jism-o-jaan ki kar ke bhi

zist ka e'tibar hai tum ko

be-nafas be-rida-e-tar-e-hayat

hum barahna hayule kya ghumen

munh khuli qabren ro rahi hongi

aao qabron mein apni lauT chalen