wahi darinda

vahī darinda

mujhe jañgal se shahr le aayā

yahāñ us ne

muskurānā sīkhā

jo kartā rahā

maiñ dekhtā rahā

aur apne andar hairateñ jam.a kartā rahā

us ne ek aurat kī chhātiyāñ

bhañbhoḌ Dālīñ

jis ne us ke uzv-e-tanāsul

aur dil ko thakā diyā hai

us ne āsmān kī taraf dekhā

aur thuuk nigal liyā

vahāñ use

koī nazar nahīñ aayā

mujhe patā na chaltā

vo lafzoñ meñ chhup jaatā

vahīñ se nahūsat se muskurātā

dikhā.ī paḌtā

kabhī kabhī

maiñ ne us se

jaan chhuḌānī chāhī

jab maiñ phuul le rahā thā

us laḌkī ke liye

jis kā dil

ek phuul se bhī ziyāda

narm aur halkā thā

maiñ ne us se

jaan chhuḌānī chāhī

jab dhuup dīvāroñ se

utarne kā naam nahīñ letī thī

aur lamhe ūñghte the

maiñ in dhuup bharī dīvāroñ meñ

use dafn karnā chāhtā thā

maiñ ne us se jaan chhuḌānī chāhī

jab maiñ ne pahlī baar

sach bolnā sīkhā

ye use pasand nahīñ aayā

us ne karodh meñ

ā.īna ījād kiyā

aur mere sāmne rakh diyā

maiñ ne dekhā

vahī darinda

maiñ ḳhud huuñ

wahi darinda

mujhe jangal se shahr le aaya

yahan us ne

muskurana sikha

jo karta raha

main dekhta raha

aur apne andar hairaten jama karta raha

us ne ek aurat ki chhatiyan

bhanbhoD Dalin

jis ne us ke uzw-e-tanasul

aur dil ko thaka diya hai

us ne aasman ki taraf dekha

aur thuk nigal liya

wahan use

koi nazar nahin aaya

mujhe pata na chalta

wo lafzon mein chhup jata

wahin se nahusat se muskuraata

dikhai paDta

kabhi kabhi

main ne us se

jaan chhuDani chahi

jab main phul le raha tha

us laDki ke liye

jis ka dil

ek phul se bhi ziyaada

narm aur halka tha

main ne us se

jaan chhuDani chahi

jab dhup diwaron se

utarne ka nam nahin leti thi

aur lamhe unghte the

main in dhup bhari diwaron mein

use dafn karna chahta tha

main ne us se jaan chhuDani chahi

jab main ne pahli bar

sach bolna sikha

ye use pasand nahin aaya

us ne karodh mein

aaina ijad kiya

aur mere samne rakh diya

main ne dekha

wahi darinda

main KHud hun