wahi maKHdush haalat

hamesha se vahī maḳhdūsh hālat

ek aadhī meñgnī dum se lagī hai

naak meñ balġham bharā hai

haDDiyāñ ubhrī huī haiñ pusht kī

do roz pahle hī

muñDī hai uun merī

sardiyoñ ke din haiñ

chaTyal be-numū maidān meñ

revaḌ ke andar

sar jhukā.e

ghaas kī ummīd meñ

maddham shikasta chaal chaltā

ḳhushk DanThal

aur polythene ke murda lifāfoñ ko chabātā

din Dhale baaḌe meñ aatā huuñ

hamesha se vahī dozaḳh kī bhārī raat

kohna ḳhauf kā asrār

gahrī bū

nukīlī qatliyoñ vaale suar

kuttoñ kī lambī bhūñk

kohre aur andhere kī chaḌhā.ī

bheḌiyoñ ke daañt

ḳhatra!

sub.h-dam baaḌe meñ

koī aadmī aatā hai

moTī chhāl kī rassī gale meñ Dāltā hai

zab.h-ḳhāne kī taraf chaltā hai

duniyā apne andar mast hai

arz-o-samā apnī jagah maujūd haiñ

paanī usī sur.at se dariyāoñ meñ bahtā hai

pahāḌoñ kī vahī istādgī

sab kuchh vahī hai

hast kī sāñseñ

musalsal chal rahī haiñ

muzmahil kamzor Tāñgeñ

ek duuje se ulajhtī dastiyāñ

be-mā.egī kā āḳhirī lamha

zabān-e-be-zabānī

ek dam gardan pe

tezī se chhurī chaltī hai

qissa ḳhatm hotā hai

hamesha se yahāñ qurbān hotā aa rahā huuñ

kār-āmad jānvar huuñ

khaal se juute

sunahrī uun se bantī haiñ sar kī Topiyāñ

aur gosht paktā hai

hamesha se wahi maKHdush haalat

ek aadhi meingni dum se lagi hai

nak mein balgham bhara hai

haDDiyan ubhri hui hain pusht ki

do roz pahle hi

munDi hai un meri

sardiyon ke din hain

chaTyal be-numu maidan mein

rewaD ke andar

sar jhukae

ghas ki ummid mein

maddham shikasta chaal chalta

KHushk DanThal

aur polythene ke murda lifafon ko chabaata

din Dhale baDe mein aata hun

hamesha se wahi dozaKH ki bhaari raat

kohna KHauf ka asrar

gahri bu

nukili qatliyon wale suar

kutton ki lambi bhunk

kohre aur andhere ki chaDhai

bheDiyon ke dant

KHatra!

subh-dam baDe mein

koi aadmi aata hai

moTi chhaal ki rassi gale mein Dalta hai

zabh-KHane ki taraf chalta hai

duniya apne andar mast hai

arz-o-sama apni jagah maujud hain

pani usi surat se dariyaon mein bahta hai

pahaDon ki wahi istadgi

sab kuchh wahi hai

hast ki sansen

musalsal chal rahi hain

muzmahil kamzor Tangen

ek duje se ulajhti dastiyan

be-maegi ka aaKHiri lamha

zaban-e-be-zabani

ek dam gardan pe

tezi se chhuri chalti hai

qissa KHatm hota hai

hamesha se yahan qurban hota aa raha hun

kar-amad jaanwar hun

khaal se jute

sunahri un se banti hain sar ki Topiyan

aur gosht pakta hai