watan

ai vatan ai rāhat-o-ārām ke dilkash dayār

tere shahroñ par tasadduq tere sahrā par nazār

husn meñ tū be-badal hai ishq meñ tū lā-javāb

raam kī tujh meñ javānī tujh meñ siitā kā shabāb

khet tere rashk-e-gulshan dasht tere lāla-zār

tujh ko baḳhshī hai mashiyyat ne bisāt-e-zar-nigār

tujh meñ haiñ ābād daulat-mand bhī nādār bhī

sīm-o-zar ke ganj bhī haiñ ret ke ambār bhī

ek hī saa.at meñ to hai shaad bhī nāshād bhī

tere chehre se ayaañ hai daad bhī fariyād bhī

hai kahīñ tū maskan-e-mazdūr vaqt-e-muflisī

hai kahīñ sarmāya-dāroñ ke liye jām-e-ḳhushī

azm-e-rāsiḳh bhī hai tujh meñ shaukat-e-dārā bhī hai

lashkar-e-jarrār kā tū afsar-e-a.alā bhī hai

ai vatan sab kuchh hai tujh meñ rūh-e-āzādī nahīñ

khā rahā hai tere bachchoñ ko ġhulāmī kā yaqīñ

ho rahī haiñ muslim-o-hindū meñ ḳhāna-jañgiyāñ

gir paḌā bhārat ke hāthoñ se uḳhuvvat kā nishāñ

ai watan ai rahat-o-aram ke dilkash dayar

tere shahron par tasadduq tere sahra par nazar

husn mein tu be-badal hai ishq mein tu la-jawab

ram ki tujh mein jawani tujh mein sita ka shabab

khet tere rashk-e-gulshan dasht tere lala-zar

tujh ko baKHshi hai mashiyyat ne bisat-e-zar-nigar

tujh mein hain aabaad daulat-mand bhi nadar bhi

sim-o-zar ke ganj bhi hain ret ke ambar bhi

ek hi saat mein to hai shad bhi nashad bhi

tere chehre se ayan hai dad bhi fariyaad bhi

hai kahin tu maskan-e-mazdur waqt-e-muflisi

hai kahin sarmaya-daron ke liye jam-e-KHushi

azm-e-rasiKH bhi hai tujh mein shaukat-e-dara bhi hai

lashkar-e-jarrar ka tu afsar-e-ala bhi hai

ai watan sab kuchh hai tujh mein ruh-e-azadi nahin

kha raha hai tere bachchon ko ghulami ka yaqin

ho rahi hain muslim-o-hindu mein KHana-jangiyan

gir paDa bhaarat ke hathon se uKHuwwat ka nishan