watan ka rag

bhārat pyārā desh hamārā sab deshoñ se nyārā hai

har rut har mausam is kā kaisā pyārā pyārā hai

kaisā suhānā kaisā sundar pyārā desh hamārā hai

dukh meñ sukh meñ har hālat meñ bhārat dil kā sahārā hai

bhārat pyārā desh hamārā sab deshoñ se nyārā hai

saare jag ke pahāḌ meñ be-misl pahāḌ himāla hai

parbat sab se ūñchā hai ye parbat sab se nirālā hai

bhārat kī rakshā kartā hai ye bhārat kā rakhvālā hai

lākhoñ chashme bahte haiñ ye lākhoñ nadiyoñ vaalā hai

bhārat pyārā desh hamārā sab deshoñ se nyārā hai

gañgā-jī kī pyārī lahreñ giit sunātī jaatī haiñ

sadiyoñ kī tahzīb hamārī yaad dilātī jaatī haiñ

bhārat ke gulzāroñ ko sarsabz banātī jaatī haiñ

khetoñ ko hariyālī detī phuul khilātī jaatī haiñ

bhārat pyārā desh hamārā sab deshoñ se nyārā hai

kirshn kī bansī ne phūñkī hai ruuh hamārī jānoñ meñ

gautam kī āvāz basī hai mahloñ meñ maidānoñ meñ

'chishtī' ne jo mai dī thī vo ab tak hai paimānoñ meñ

'nānak' kī ta.alīm abhī tak guuñj rahī hai kānoñ meñ

bhārat pyārā desh hamārā sab deshoñ se nyārā hai

maz.hab kuchh ho hindī haiñ ham saare bhaa.ī bhaa.ī haiñ

hindū haiñ yā muslim haiñ yā sukh haiñ yā īsā.ī haiñ

prem ne sab ko ek kiyā hai prem ke ham shaidā.ī haiñ

bhārat naam ke āshiq haiñ ham bhārat ke shaidā.ī haiñ

bhārat pyārā desh hamārā sab deshoñ se nyārā hai

bhaarat pyara desh hamara sab deshon se nyara hai

har rut har mausam is ka kaisa pyara pyara hai

kaisa suhana kaisa sundar pyara desh hamara hai

dukh mein sukh mein har haalat mein bhaarat dil ka sahaara hai

bhaarat pyara desh hamara sab deshon se nyara hai

sare jag ke pahaD mein be-misl pahaD himala hai

parbat sab se uncha hai ye parbat sab se nirala hai

bhaarat ki raksha karta hai ye bhaarat ka rakhwala hai

lakhon chashme bahte hain ye lakhon nadiyon wala hai

bhaarat pyara desh hamara sab deshon se nyara hai

ganga-ji ki pyari lahren git sunati jati hain

sadiyon ki tahzib hamari yaad dilati jati hain

bhaarat ke gulzaron ko sarsabz banati jati hain

kheton ko hariyali deti phul khilati jati hain

bhaarat pyara desh hamara sab deshon se nyara hai

kirshn ki bansi ne phunki hai ruh hamari jaanon mein

gautam ki aawaz basi hai mahlon mein maidanon mein

'chishti' ne jo mai di thi wo ab tak hai paimanon mein

'nanak' ki talim abhi tak gunj rahi hai kanon mein

bhaarat pyara desh hamara sab deshon se nyara hai

mazhab kuchh ho hindi hain hum sare bhai bhai hain

hindu hain ya muslim hain ya sukh hain ya isai hain

prem ne sab ko ek kiya hai prem ke hum shaidai hain

bhaarat nam ke aashiq hain hum bhaarat ke shaidai hain

bhaarat pyara desh hamara sab deshon se nyara hai