watan ki shan

raanī jab schōl se aa.ī

ammī ko ye baat batā.ī

ammī jī schōl meñ apne

ḳhuub huī hai aaj safā.ī

konā konā saaf huā hai

sābun se bhī huī dhulā.ī

ham ne sundar chart banā.e

aur ik ik dīvār sajā.ī

phūloñ ke paudoñ se ham ne

gulshan kī dhartī mahkā.ī

is se bhī baḌh kar ammī bhī

aur huī hai ek baḌā.ī

vaqt pe madam aa jaatī haiñ

hotī hai ab ḳhuub paḌhā.ī

ammī ye kyā bhed hai āḳhir

kaise ye tabdīlī aa.ī

ye sun kar phir ammī bolīñ

beTī ko har baat batā.ī

tum ko ye mālūm nahīñ hai

bhārat ne lī hai añgḌā.ī

bachcha bachcha jaag uThā hai

ḳhuun meñ sab ke garmī aa.ī

daftar mil schōl dukāneñ

chhā.ī hai sab par ra.anā.ī

mandir masjid gurudvāre bhī

karte haiñ jalva-ārā.ī

jangal jangal sabza lahkā

dahqāñ kī ummīd bar aa.ī

shahr hue haiñ saaf aur suthre

gaañv meñ bhī raunaq aa.ī

kitne hī dukh duur hue haiñ

ghaTtī jaatī hai mahñgā.ī

jhuggī meñ rahne vāloñ ko

colony kī raah dikhā.ī

bhārat meñ ab amn-o-amāñ hai

miT ga.e jhagḌe aur laḌā.ī

des ke dushman sakte meñ haiñ

bol ke sab ne muñh kī khaa.ī

jai ho jai indarā gāñdhī kī

us ne vatan kī shaan baḌhā.ī

rani jab school se aai

ammi ko ye baat batai

ammi ji school mein apne

KHub hui hai aaj safai

kona kona saf hua hai

sabun se bhi hui dhulai

hum ne sundar chart banae

aur ek ek diwar sajai

phulon ke paudon se hum ne

gulshan ki dharti mahkai

is se bhi baDh kar ammi bhi

aur hui hai ek baDai

waqt pe madam aa jati hain

hoti hai ab KHub paDhai

ammi ye kya bhed hai aaKHir

kaise ye tabdili aai

ye sun kar phir ammi bolin

beTi ko har baat batai

tum ko ye malum nahin hai

bhaarat ne li hai angDai

bachcha bachcha jag uTha hai

KHun mein sab ke garmi aai

daftar mil school dukanen

chhai hai sab par ranai

mandir masjid gurudware bhi

karte hain jalwa-arai

jangal jangal sabza lahka

dahqan ki ummid bar aai

shahr hue hain saf aur suthre

ganw mein bhi raunaq aai

kitne hi dukh dur hue hain

ghaTti jati hai mahngai

jhuggi mein rahne walon ko

colony ki rah dikhai

bhaarat mein ab amn-o-aman hai

miT gae jhagDe aur laDai

des ke dushman sakte mein hain

bol ke sab ne munh ki khai

jai ho jai indara gandhi ki

us ne watan ki shan baDhai