virana-e-KHayal

dasht-e-garm-o-sard meñ ye be-dayāroñ kā hujūm

be-ḳhabar māhaul se

chup-chāp

ḳhud se ham-kalām

chal rahā hai sar jhukā.e is tarah

jis tarah marghaT pe rūhoñ kā ḳhirām

zard chehroñ par hai sadiyoñ kī thakan

saañs lete haiñ kuchh aise

jaise hotī ho chubhan

hoñT par ġhamgīñ tabassum aur siine meñ bukā

har qadam par haDDiyoñ ke kaḌkaḌāne kī sadā

un kī āñkheñ

jin pe hukm-e-dīda-e-bīnā lagāte haiñ

devtāoñ kī basīrat kaañp jaa.e

zehn o dil kā fāsla tai karte karte haañp jaa.e

vus.at-e-arz-o-samā ik dīda-e-hairān hai

uf! ye melā kis qadar vīrān hai!!

dasht-e-garm-o-sard mein ye be-dayaron ka hujum

be-KHabar mahaul se

chup-chap

KHud se ham-kalam

chal raha hai sar jhukae is tarah

jis tarah marghaT pe ruhon ka KHiram

zard chehron par hai sadiyon ki thakan

sans lete hain kuchh aise

jaise hoti ho chubhan

honT par ghamgin tabassum aur sine mein buka

har qadam par haDDiyon ke kaDkaDane ki sada

un ki aankhen

jin pe hukm-e-dida-e-bina lagate hain

dewtaon ki basirat kanp jae

zehn o dil ka fasla tai karte karte hanp jae

wusat-e-arz-o-sama ek dida-e-hairan hai

uf! ye mela kis qadar viran hai!!