wijdan

hijr-o-visāl ke beach bhī ik mausam hotā hai

jaise tumhārī gum-sum āñkheñ

jaise mirī adhūrī nazmeñ

jaise chhāchh kā ḳhālī pyāla

jaise chaak pe aadhā bartan

jaise kisī sayyāre par chhe maah kī raat

jaise kisī taḳhlīq ke lamhe karb kī lazzat

jaise ḳhvāb meñ vasl kā nashsha

jaise lahū meñ vahshī gītoñ kī sarshārī

jaise banjar kor zamīñ kī pyāsī kokh meñ numū kī ḳhvāhish

jaise garm garm hathelī beach kisī ke naam kī mehñdī

jaise korī narm dahaktī poroñ kī shītal āñkhoñ meñ

lams ke pahle ḳhvāb kī hairat

kuchh na samajhne aur samjhāne ke mausam kī kachchī bāteñ

sauñdhe jazbe

hijr-o-visāl ke beach bhī ik mausam hotā hai

jaise laḌkī ke siine meñ

pahlī raat kā mīThā ḳhauf aur chuTkī letā maddham dhaḌkā

jaise maañ ke pistānoñ se hoñT haTā kar

hañsne vaale bachche kī āsūda āñkheñ

jaise jañg ke ba.ad

luTe hue gaañv meñ tanhā būḌhā

bail kī joḌī

rahaT kā san san bahtā paanī

roñdī fasleñ

sarkañDoñ ke beach phaTe āñchal kī dhajjī

gahrā āsebī sannāTā

jaise kisī bansī kī dhun par

piir kabīr kā saada dohā

jaise bharī chaupāl kī chup ke beach

kahānī-kār ke lambe saañs kā vaqfa

hijr-o-visāl ke beach bhī ik mausam hotā hai

hijr-o-visal ke beach bhi ek mausam hota hai

jaise tumhaari gum-sum aankhen

jaise meri adhuri nazmen

jaise chhachh ka KHali pyala

jaise chaak pe aadha bartan

jaise kisi sayyare par chhe mah ki raat

jaise kisi taKHliq ke lamhe karb ki lazzat

jaise KHwab mein wasl ka nashsha

jaise lahu mein wahshi giton ki sarshaari

jaise banjar kor zamin ki pyasi kokh mein numu ki KHwahish

jaise garm garm hatheli beach kisi ke nam ki mehndi

jaise kori narm dahakti poron ki shital aankhon mein

lams ke pahle KHwab ki hairat

kuchh na samajhne aur samjhane ke mausam ki kachchi baaten

saundhe jazbe

hijr-o-visal ke beach bhi ek mausam hota hai

jaise laDki ke sine mein

pahli raat ka miTha KHauf aur chuTki leta maddham dhaDka

jaise man ke pistanon se honT haTa kar

hansne wale bachche ki aasuda aankhen

jaise jang ke baad

luTe hue ganw mein tanha buDha

bail ki joDi

rahaT ka san san bahta pani

rondi faslen

sarkanDon ke beach phaTe aanchal ki dhajji

gahra aasebi sannaTa

jaise kisi bansi ki dhun par

pir kabir ka sada doha

jaise bhari chaupal ki chup ke beach

kahani-kar ke lambe sans ka waqfa

hijr-o-visal ke beach bhi ek mausam hota hai