wishaal desh

nashriya aal india radio bhopal indaur 8 july 68

sajī huī guloñ se ye hasīn vādiyāñ

ye sabza-zār-e-ḳhushnumā harī-bharī ye khetiyāñ

ye nahreñ jin meñ zindagī bhare hue hai mastiyāñ

ye jhilmilātī naddiyāñ ye muskurātī naddiyāñ

ye gaañv gaañv shahr shahr svarg ke samān haiñ

mere aziim desh kī ye bastiyāñ mahān haiñ

jagah jagah vikās kī ubhar rahī hai raushnī

na.ī adā se karvaTeñ badal rahī hai zindagī

mahak uThī ravish ravish chamak uThī galī galī

vo aaj phuul ban ga.ī jo kal thī adh-khilī kalī

jo pastiyāñ thiiñ kal vo ab urūj-e-āsmān haiñ

mire aziim desh kī ye bastiyāñ mahān haiñ

buland ūñchī buildingeñ ye jagmagāte rāste

basoñ ke motoroñ ke dauḌte hue ye silsile

kaloñ kī gaḌgaḌāhaToñ meñ zindagī ke valvale

taraqqiyoñ kī khoj meñ ravāñ davāñ ye qāfile

mire vatan kī ruuh haiñ mire chaman kī jaan haiñ

mire vishāl desh ke bhavishya kā nishān haiñ

har ek fard is chaman kā aaj pāsbān hai

clerk yā majūr hai javān yā kisān hai

mirā vatan aziim hai mirā vatan mahān hai

ye khetiyoñ kā desh hai miloñ kā ye jahān hai

ye sar-buland chimniyāñ vatan kī ān-bān haiñ

harī bharī ye khetiyāñ mire chaman kī shaan haiñ

nashriya aal india radio bhopal indaur 8 july 68

saji hui gulon se ye hasin wadiyan

ye sabza-zar-e-KHushnuma hari-bhari ye khetiyan

ye nahren jin mein zindagi bhare hue hai mastiyan

ye jhilmilati naddiyan ye muskuraati naddiyan

ye ganw ganw shahr shahr swarg ke saman hain

mere azim desh ki ye bastiyan mahan hain

jagah jagah wikas ki ubhar rahi hai raushni

nai ada se karwaTen badal rahi hai zindagi

mahak uThi rawish rawish chamak uThi gali gali

wo aaj phul ban gai jo kal thi adh-khili kali

jo pastiyan thin kal wo ab uruj-e-asman hain

mere azim desh ki ye bastiyan mahan hain

buland unchi buildingen ye jagmagate raste

bason ke motoron ke dauDte hue ye silsile

kalon ki gaDgaDahaTon mein zindagi ke walwale

taraqqiyon ki khoj mein rawan dawan ye qafile

mere watan ki ruh hain mere chaman ki jaan hain

mere wishaal desh ke bhawishya ka nishan hain

har ek fard is chaman ka aaj pasban hai

clerk ya majur hai jawan ya kisan hai

mera watan azim hai mera watan mahan hai

ye khetiyon ka desh hai milon ka ye jahan hai

ye sar-buland chimniyan watan ki aan-ban hain

hari bhari ye khetiyan mere chaman ki shan hain