wo arsa jo duri mein guzra

maiñ kaise batā.ūñ

vo arsa jo duurī meñ guzrā

huzūrī meñ guzrā

maiñ us kī vazāhat nahīñ kar sakūñgā

sar-e-shām hī

koī lā-shakl kuut

mujhe apne narġhe meñ rakhtī

mazā letī mere namak kā

kabhī merī shīrīnī chkhtī

kabhī mujh ko qatre

kabhī mujh ko zarre meñ tabdīl kartī

kabhī mujh ko hai.at meñ laatī

kabhī merī hai.at ko tahlīl kartī

adhūrā samajhtī

kabhī mujh ko puurā samajhtī

usī gomago meñ mujhe toḌ detī

mirī TukḌiyoñ ko milātī

mujhe joḌ detī

maiñ kaise batā.ūñ

ki jo kaifiyat mujh pe guzrī

asātīrī hargiz nahīñ thī

kisī dev-mālā se

sā gā se

jā tak kahānī se

us kā ilāqa nahīñ thā

kisī ḳhvāb kā ye vaqūa nahīñ thā

na ye vāhima thā

jise aql tashkīl detī hai

hairat kā varta

hisār-e-nafas yā nazar kā karishma

koī vārida

paas anfās tanvīm yā mismirism

koī habs-e-dam

jazb-o-mastī

kisī sant-sādhū kī shaktī

kisī suufī sālik kā ilhām

sarsām

vahshat kī lai

vajd yā haal sī koī shai

ek shīshe ke andar koī chiiz

burrāq parde pe raqsāñ sī

fānūs-e-gardāñ sī

tasvīrī hargiz nahīñ thī

asātīrī hargiz nahīñ thī

maiñ kaise batā.ūñ

ki jo kaifiyat mujh pe guzrī

maiñ us kaifiyat meñ dobāra

kisī taur shirkat nahīñ kar sakūñgā

vo arsa jo duurī meñ guzrā

huzūrī meñ guzrā

maiñ us kī vazāhat nahīñ kar sakūñgā

main kaise bataun

wo arsa jo duri mein guzra

huzuri mein guzra

main us ki wazahat nahin kar sakunga

sar-e-sham hi

koi la-shakl kut

mujhe apne narghe mein rakhti

maza leti mere namak ka

kabhi meri shirini chkhti

kabhi mujh ko qatre

kabhi mujh ko zarre mein tabdil karti

kabhi mujh ko haiat mein lati

kabhi meri haiat ko tahlil karti

adhura samajhti

kabhi mujh ko pura samajhti

usi gomago mein mujhe toD deti

meri TukDiyon ko milati

mujhe joD deti

main kaise bataun

ki jo kaifiyat mujh pe guzri

asatiri hargiz nahin thi

kisi dew-mala se

sa ga se

ja tak kahani se

us ka ilaqa nahin tha

kisi KHwab ka ye waqua nahin tha

na ye wahima tha

jise aql tashkil deti hai

hairat ka warta

hisar-e-nafas ya nazar ka karishma

koi warida

pas anfas tanwim ya mismirism

koi habs-e-dam

jazb-o-masti

kisi sant-sadhu ki shakti

kisi sufi salik ka ilham

sarsam

wahshat ki lai

wajd ya haal si koi shai

ek shishe ke andar koi chiz

burraq parde pe raqsan si

fanus-e-gardan si

taswiri hargiz nahin thi

asatiri hargiz nahin thi

main kaise bataun

ki jo kaifiyat mujh pe guzri

main us kaifiyat mein dobara

kisi taur shirkat nahin kar sakunga

wo arsa jo duri mein guzra

huzuri mein guzra

main us ki wazahat nahin kar sakunga