wo chup rahne ko kahte hain jo hum fariyaad karte hain

ilāhī ḳhair vo har dam na.ī bedād karte haiñ

hamīñ tohmat lagāte haiñ jo ham fariyād karte haiñ

kabhī āzād karte haiñ kabhī bedād karte haiñ

magar us par bhī ham sau jī se un ko yaad karte haiñ

asīrān-e-qafas se kaash ye sayyād kah detā

raho āzād ho kar ham tumheñ āzād karte haiñ

rahā kartā hai ahl-e-ġham ko kyā kyā intizār is kā

ki dekheñ vo dil-e-nāshād ko kab shaad karte haiñ

ye kah kah kar basar kī umr ham ne qaid-e-ulfat meñ

vo ab āzād karte haiñ vo ab āzād karte haiñ

sitam aisā nahīñ dekhā jafā aisī nahīñ dekhī

vo chup rahne ko kahte haiñ jo ham fariyād karte haiñ

ye baat achchhī nahīñ hotī ye baat achchhī nahīñ hotī

hameñ bekas samajh kar aap kyuuñ barbād karte haiñ

koī bismil banātā hai jo maqtal meñ hameñ 'bismil'

to ham Dar kar dabī āvāz se fariyād karte haiñ

ilahi KHair wo har dam nai bedad karte hain

hamin tohmat lagate hain jo hum fariyaad karte hain

kabhi aazad karte hain kabhi bedad karte hain

magar us par bhi hum sau ji se un ko yaad karte hain

asiran-e-qafas se kash ye sayyaad kah deta

raho aazad ho kar hum tumhein aazad karte hain

raha karta hai ahl-e-gham ko kya kya intizar is ka

ki dekhen wo dil-e-nashad ko kab shad karte hain

ye kah kah kar basar ki umr hum ne qaid-e-ulfat mein

wo ab aazad karte hain wo ab aazad karte hain

sitam aisa nahin dekha jafa aisi nahin dekhi

wo chup rahne ko kahte hain jo hum fariyaad karte hain

ye baat achchhi nahin hoti ye baat achchhi nahin hoti

hamein bekas samajh kar aap kyun barbaad karte hain

koi bismil banata hai jo maqtal mein hamein 'bismil'

to hum Dar kar dabi aawaz se fariyaad karte hain