wo dil hairan nahin hote

havā aur dhuup kā qarnoñ purānā saath hai

aur zindagī mauj-e-ravāñ hai

vo kisī pal ruk nahīñ saktī

na-jāne kitne barsoñ kī ye pur-asrār tanhā.ī

mire dil meñ

khajūroñ ke daraḳhtoñ kī tarah

yuuñ īstāda hai

ki ujḌe qartaba ke saare manzar

merī āñkhoñ meñ larazte haiñ

na-jāne kitne barsoñ kī udāsī ke

añdhere gumbadoñ meñ gūñjte

jāñ-soz andeshe

musalsal mujh pe yūrish karte haiñ

aur undulus ke kūcha-o-bāzār aur bāġhoñ ko

faulādī sumoñ se rauñdte

ghoḌoñ kī Tāpoñ se

mirā siina dhamaktā hai

mire ehsās kī ye ranjisheñ

aur ruuh ke ye dukh kisī ik sā.at-e-saffāk ne

mujh ko nahīñ sauñpe

ki ye to asal meñ vo jaal hai

tārīḳh kī makḌī jo sadiyoñ se

mire andar kahīñ

chup-chāp buntī hai

havā aur dhuup merī zindagī ke manzaroñ meñ

be-sabātī kī alāmat haiñ

zamīñ kī gardishoñ se tez hai

hālāt kī gardish

isī ne mere sar meñ ḳhaak Daalī hai

yahī to merī āñkhoñ meñ

pighaltī barf kī dīvār chuntī hai

ye kis kī baat suntī hai

mirī sāñsoñ meñ

ġharnāta kī dhuul

uḌtī hai

aur ḳhāmosh dehlī kī

havā.eñ sarsarātī haiñ

huuñ

havā kā ruḳh badalne par

vo dil hairāñ nahīñ hote

hawa aur dhup ka qarnon purana sath hai

aur zindagi mauj-e-rawan hai

wo kisi pal ruk nahin sakti

na-jaane kitne barson ki ye pur-asrar tanhai

mere dil mein

khajuron ke daraKHton ki tarah

yun istada hai

ki ujDe qartaba ke sare manzar

meri aankhon mein larazte hain

na-jaane kitne barson ki udasi ke

andhere gumbadon mein gunjte

jaan-soz andeshe

musalsal mujh pe yurish karte hain

aur undulus ke kucha-o-bazar aur baghon ko

fauladi sumon se raundte

ghoDon ki Tapon se

mera sina dhamakta hai

mere ehsas ki ye ranjishen

aur ruh ke ye dukh kisi ek saat-e-saffak ne

mujh ko nahin saunpe

ki ye to asal mein wo jal hai

tariKH ki makDi jo sadiyon se

mere andar kahin

chup-chap bunti hai

hawa aur dhup meri zindagi ke manzaron mein

be-sabaati ki alamat hain

zamin ki gardishon se tez hai

haalat ki gardish

isi ne mere sar mein KHak Dali hai

yahi to meri aankhon mein

pighalti barf ki diwar chunti hai

ye kis ki baat sunti hai

meri sanson mein

gharnata ki dhul

uDti hai

aur KHamosh dehli ki

hawaen sarsaraati hain

hun

hawa ka ruKH badalne par

wo dil hairan nahin hote