wo ishq jo hum ko lahiq tha

vo ishq jo ham ko lāhiq thā

shab-hā-e-siyah ke dāman meñ

asrār junūñ ke khol gayā

bahr-e-maujūd ke markaz se

ik mauj-e-talātum-ḳhez uTThī

ik dard kī lahar uThī dil ke rauzan se

jis meñ simaT ga.e

donoñ aalam ke ranj o tarab

aur hast-o-būd ke mahvar par

ranj o rāhat ham-raqs hue

furqat ke tanhā lamhoñ meñ

ābād thī ik duniyā-e-fusūñ

raftār-e-ġham kī mauj-e-ravāñ

āvāra bagūle yādoñ ke

bārish kī maddham būñdoñ ke

sargam kī farāvāñ mausīqī

ashjār kī raqsāñ shāḳhoñ se

chhantā huā fitrat kā jaadū

duniyā-e-nashāt-o-dard kī lai

andoh o alam kā ik aalam

taḳhlīq ke larzāñ siine ke asrār-e-nihāñ

naġhma-bar-lab ye arz o samā

nauha dard-e-dil bātin kī fazā

taḳhlīq jahāñ ke sar nihāñ

patte patte kī rañgat meñ

harf kin kā jaadū larzāñ

sab ik vahdat meñ jazb hue

ik vajd āgīñ ehsās meñ

ruuh o jism o jaañ malbūs hue

vaqt aur makāñ ke sirr-e-nihāñ malbūs hue

is ishq se ye asrār khulā

ham zinda haiñ aur rāh-e-fanā meñ jaulāñ haiñ

ik roz ye dil bujh jā.egā

bas nūr-e-ḳhudā rah jā.egā

vo ishq jo ham ko lāhiq thā

asrār-e-vajūd o ramz-e-adam sab khol gayā

wo ishq jo hum ko lahiq tha

shab-ha-e-siyah ke daman mein

asrar junun ke khol gaya

bahr-e-maujud ke markaz se

ek mauj-e-talatum-KHez uTThi

ek dard ki lahar uThi dil ke rauzan se

jis mein simaT gae

donon aalam ke ranj o tarab

aur hast-o-bud ke mahwar par

ranj o rahat ham-raqs hue

furqat ke tanha lamhon mein

aabaad thi ek duniya-e-fusun

raftar-e-gham ki mauj-e-rawan

aawara bagule yaadon ke

barish ki maddham bundon ke

sargam ki farawan mausiqi

ashjar ki raqsan shaKHon se

chhanta hua fitrat ka jadu

duniya-e-nashat-o-dard ki lai

andoh o alam ka ek aalam

taKHliq ke larzan sine ke asrar-e-nihan

naghma-bar-lab ye arz o sama

nauha dard-e-dil baatin ki faza

taKHliq jahan ke sar nihan

patte patte ki rangat mein

harf kin ka jadu larzan

sab ek wahdat mein jazb hue

ek wajd aagin ehsas mein

ruh o jism o jaan malbus hue

waqt aur makan ke sirr-e-nihan malbus hue

is ishq se ye asrar khula

hum zinda hain aur rah-e-fana mein jaulan hain

ek roz ye dil bujh jaega

bas nur-e-KHuda rah jaega

wo ishq jo hum ko lahiq tha

asrar-e-wajud o ramz-e-adam sab khol gaya