wo kya maslahat thi

maiñ āġhāz-e-hastī se havvā kī sūrat

huuñ aadam kī ḳhvāhish kā ik shāḳhsāna

zamīñ ko basāne kā bas ik bahāna!

maiñ roz-e-abad nekiyoñ kā sila huuñ

na jaane maiñ kyā huuñ

gila ḳhāliq-e-kul se kaise karūñ maiñ

usī kī razā huuñ

ye hai faḳhr-e-ādam

ki bas ibn-e-ādam

amīn-e-ḳhudā hai qarīn-e-ḳhudā hai

mirī hastī kyā hai

faqat vāsta hai!

ye taslīm hai

har sahīfe meñ

maiñ ābida momina sāliha thī

magar jab farishtoñ ne aadam ko sajda kiyā thā

to havvā kahāñ thī

maiñ rūhoñ ke iqrār ke vaqt

jaane kahāñ kaun sī saf meñ thī

yā nahīñ thii?

agar thī to iqrār bhī to kiyā thā

adam meñ agar ruuh ḳhud-muktafī thī

to phir ḳhāliq-e-kun-fakāñ kī vo kyā maslahat thī

ki maiñ dūsrī thī!!

main aaghaz-e-hasti se hawwa ki surat

hun aadam ki KHwahish ka ek shaKHsana

zamin ko basane ka bas ek bahana!

main roz-e-abad nekiyon ka sila hun

na jaane main kya hun

gila KHaliq-e-kul se kaise karun main

usi ki raza hun

ye hai faKHr-e-adam

ki bas ibn-e-adam

amin-e-KHuda hai qarin-e-KHuda hai

meri hasti kya hai

faqat wasta hai!

ye taslim hai

har sahife mein

main aabida momina saliha thi

magar jab farishton ne aadam ko sajda kiya tha

to hawwa kahan thi

main ruhon ke iqrar ke waqt

jaane kahan kaun si saf mein thi

ya nahin thi?

agar thi to iqrar bhi to kiya tha

adam mein agar ruh KHud-muktafi thi

to phir KHaliq-e-kun-fakan ki wo kya maslahat thi

ki main dusri thi!!