wo sarab jo meri jaan mein hai

ai ġhazāl-e-shab

tirī pyaas kaise bujhā.ūñ maiñ

ki dikhā.ūñ maiñ vo sarāb jo mirī jaañ meñ hai

vo sarāb sāhir-e-ḳhauf hai

jo sahar se shaam ke rah-guzar

meñ fareb-e-rah-rav-e-sāda hai

vo sarāb-zāda sarāb-gar ki hazār sūrat-e-nau-ba-nau

meñ qadam qadam pe sitāda hai

vo jo ġhālib-o-hama-gīr dasht-e-gumāñ meñ hai

mire dil meñ jaise yaqīn ban ke samā gayā

mire hast-o-būd pe chhā gayā

ai ġhazāl-e-shab

usī fitna-kār se chhup ga.e

mire der-o-zūd bhī ḳhvāb meñ

mire nazd-o-dūr hijāb meñ

vo hijāb kaise uThā.ūñ maiñ jo kashīda qālib-e-dil meñ hai

ki maiñ dekh pā.ūñ darūn-e-jāñ

jahāñ ḳhauf-o-ġham kā nishāñ nahīñ

jahāñ ye sarāb-e-ravāñ nahīñ

ai ġhazāl-e-shab

ai ghazal-e-shab

teri pyas kaise bujhaun main

ki dikhaun main wo sarab jo meri jaan mein hai

wo sarab sahir-e-KHauf hai

jo sahar se sham ke rah-guzar

mein fareb-e-rah-raw-e-sada hai

wo sarab-zada sarab-gar ki hazar surat-e-nau-ba-nau

mein qadam qadam pe sitada hai

wo jo ghaalib-o-hama-gir dasht-e-guman mein hai

mere dil mein jaise yaqin ban ke sama gaya

mere hast-o-bud pe chha gaya

ai ghazal-e-shab

usi fitna-kar se chhup gae

mere der-o-zud bhi KHwab mein

mere nazd-o-dur hijab mein

wo hijab kaise uThaun main jo kashida qalib-e-dil mein hai

ki main dekh paun darun-e-jaan

jahan KHauf-o-gham ka nishan nahin

jahan ye sarab-e-rawan nahin

ai ghazal-e-shab