wo shaKH-e-mahtab kaT chuki hai

bahut dinoñ se

vo shāḳh-e-mahtāb kaT chukī hai

ki jis pe tum ne giraft-e-va.ada kī reshmī shaal ke sitāre sajā diye the

bahut dinoñ se

vo gard-e-ehsās chhaT chukī hai

ki jis ke zarroñ pe tum ne

palkoñ kī jhālroñ ke tamām nīlam luTā diye the

aur ab to yuuñ hai ki jaise

lab-basta hijratoñ kā har ek lamha

tavīl sadiyoñ ko oḌh kar saañs le rahā hai

aur ab to yuuñ hai ki jaise tum ne

pahāḌ rātoñ ko

merī andhī ujaaḌ āñkhoñ meñ

reza reza basā diyā hai

ki jaise maiñ ne

figār-dil kā hunar-asāsa

kahīñ chhupā kar bhulā diyā hai

aur ab to yuuñ hai ki

apnī āñkhoñ pe haath rakh kar

mire badan par saje hue ābloñ se bahtā lahū na dekho

mujhe kabhī surḳh-rū na dekho

na merī yādoñ ke jalte-bujhte nishāñ kuredo

na mere maqtal kī ḳhaak dekho

aur ab to yuuñ hai ki

apnī āñkhoñ ke ḳhvāb

apne darīda-dāman ke chaak dekho

ki gard-e-ehsās chhaT chukī hai

ki shāḳh-e-mahtāb kaT chukī hai

bahut dinon se

wo shaKH-e-mahtab kaT chuki hai

ki jis pe tum ne giraft-e-wada ki reshmi shaal ke sitare saja diye the

bahut dinon se

wo gard-e-ehsas chhaT chuki hai

ki jis ke zarron pe tum ne

palkon ki jhaalron ke tamam nilam luTa diye the

aur ab to yun hai ki jaise

lab-basta hijraton ka har ek lamha

tawil sadiyon ko oDh kar sans le raha hai

aur ab to yun hai ki jaise tum ne

pahaD raaton ko

meri andhi ujaD aankhon mein

reza reza basa diya hai

ki jaise main ne

figar-dil ka hunar-asasa

kahin chhupa kar bhula diya hai

aur ab to yun hai ki

apni aankhon pe hath rakh kar

mere badan par saje hue aablon se bahta lahu na dekho

mujhe kabhi surKH-ru na dekho

na meri yaadon ke jalte-bujhte nishan kuredo

na mere maqtal ki KHak dekho

aur ab to yun hai ki

apni aankhon ke KHwab

apne darida-daman ke chaak dekho

ki gard-e-ehsas chhaT chuki hai

ki shaKH-e-mahtab kaT chuki hai