yaad-dahani

andhī raat ke aate hī

sab chup-chāp se ik goshe meñ simaT ga.e

par maiñ ne apnī kuTiyā kī tārīkī se jañg kī Thānī

ḳhud ko ik maTkī ke diye meñ Dhaal diyā

tab chhoTe se āñgan meñ nannhī-munnī muskātī kirnoñ ne jhūmar Daalā

sab ke raushan raushan chehre hañsne lage

lekin sub.h ke jāgte hī

mirī thakī thakī sī nannhī-munnī kirnoñ ko Thokar se uḌāte

duur tak phaile hue khet meñ shabnam ke qumqume miTāte

raushnī ke ambāroñ meñ se rasta banāte

jagmag jagmag sūraj ke aivāñ kī jānib baḌhne vālo!

mere apno

mujh ko kuTiyā ke ek taaq meñ rakh kar bhuul ga.e ho??

andhi raat ke aate hi

sab chup-chap se ek goshe mein simaT gae

par main ne apni kuTiya ki tariki se jang ki Thani

KHud ko ek maTki ke diye mein Dhaal diya

tab chhoTe se aangan mein nannhi-munni muskati kirnon ne jhumar Dala

sab ke raushan raushan chehre hansne lage

lekin subh ke jagte hi

meri thaki thaki si nannhi-munni kirnon ko Thokar se uDate

dur tak phaile hue khet mein shabnam ke qumqume miTate

raushni ke ambaron mein se rasta banate

jagmag jagmag suraj ke aiwan ki jaanib baDhne walo!

mere apno

mujh ko kuTiya ke ek taq mein rakh kar bhul gae ho??