yaad

yaad karte rahe aah bharte rahe

roz jiite rahe roz marte rahe

apne jazbāt ko qatl karte rahe

aur patthar ke ham ik sanam ho ga.e

zaḳhm hijrat kā terī mire dil pe hai

ruuh tūfāñ meñ hai jism sāhil pe hai

qatl karne se pahle badal jā.egā

ham ko ab bhī bharosa ye qātil pe hai

zindagī saaz hai pyaar sañgīt hai

pyaar kī haar bhī pyaar kī jiit hai

pyaar meñ hārte pyaar meñ jīt.te

pyaar ke giit kah ham qalam ho ga.e

maiñ ne qudrat ke rañgoñ meñ DhūñDhā tujhe

maiñ ne sheroñ meñ terī kahānī likhī

sher meñ bas tumhārā nazārā kiyā

din mubārak likhā shab suhānī likhī

sab haiñ apne yahāñ koī duujā nahīñ

pyaar sajda bhī hai sirf puujā nahīñ

ham azaañ ban ke gūñje tumhāre liye

aur hamāre liye tum bhajan ho ga.e

ham tumhāre hue tum kisī ke hue

koī merā huā zindagī ke liye

kuchh na jaane hue kuchh na samjhe hue

jaan detā hai merī ḳhushī ke liye

ai muqaddas ḳhudā tū use shaad rakh

us kī ḳhushiyāñ ghar us kā tū ābād rakh

us ko har ġham se maulā tū āzād rakh

us pe ab tak bahut se sitam ho ga.e

yaad karte rahe aah bharte rahe

roz jite rahe roz marte rahe

apne jazbaat ko qatl karte rahe

aur patthar ke hum ek sanam ho gae

zaKHm hijrat ka teri mere dil pe hai

ruh tufan mein hai jism sahil pe hai

qatl karne se pahle badal jaega

hum ko ab bhi bharosa ye qatil pe hai

zindagi saz hai pyar sangit hai

pyar ki haar bhi pyar ki jit hai

pyar mein haarte pyar mein jitte

pyar ke git kah hum qalam ho gae

main ne qudrat ke rangon mein DhunDha tujhe

main ne sheron mein teri kahani likhi

sher mein bas tumhaara nazara kiya

din mubarak likha shab suhani likhi

sab hain apne yahan koi duja nahin

pyar sajda bhi hai sirf puja nahin

hum azan ban ke gunje tumhaare liye

aur hamare liye tum bhajan ho gae

hum tumhaare hue tum kisi ke hue

koi mera hua zindagi ke liye

kuchh na jaane hue kuchh na samjhe hue

jaan deta hai meri KHushi ke liye

ai muqaddas KHuda tu use shad rakh

us ki KHushiyan ghar us ka tu aabaad rakh

us ko har gham se maula tu aazad rakh

us pe ab tak bahut se sitam ho gae