yaran-e-najd

ai bād-e-sub.h-gāhī dil keī kalī khilā de

vīrāna mere dil kā rashk-e-chaman banā de

us bazm-e-jāñ-fazā kā nazzāra phir dikhā de

gulzār-e-ārzū meñ phir taaza gul khilā de

ye kār-zār-e-hastī hai ranj-o-ġham keī bastī

phir yād-e-bazm-e-jam meñ ik jām-e-jam pilā de

ab shām-e-zindagī keī zulmat hai chhāne vaalī

vo sub.h-e-dil-kushā kā nazzāra phir dikhā de

pastī meñ pā-ba-gil hai umr-e-ravāñ kā dariyā

phir ūñchī vādiyoñ ke manzar use dikhā de

vo ahd-e-shādmānī vo itr-e-zindagānī

ai daur-e-āsmānī vāpas kahīñ se laade

ai bāġhbāñ ho tujh ko taḳht-e-chaman mubārak

mujh ko vo ham-navā de vo merā ghoñsla de

kin hasratoñ se 'nāzir' us anjuman se nikle

melā sā lag rahā hai jab ham chaman se nikle

ahvāl-e-bazm-e-gulshan ai nāma-bar sunānā

vo dāstāñ hai dilkash rañgīñ hai vo fasāna

us bazm-e-dil-kushā meñ ulfat keī us fazā meñ

tāroñ keī raushnī meñ yāroñ kā mil ke gaanā

kānoñ meñ rach rahī hai koyal keī kuuk ab tak

'nāzir' kā hai vazīfa us dhun meñ gungunānā

collage keī sarzamīñ thī yā naqsh-e-dil-nashīñ thī

dil se ḳhayāl us kā mumkin nahīñ bhulānā

dariyā meñ mil ke jaise hoñ naddiyāñ ham-āġhosh

begāna kal jo aayā vo aaj thā yagāna

bahr-e-tavāf jaanā pīr-e-muġhāñ ke dar par

aur us keī ik nigah se sarmast ho ke aanā

us chashm-e-mast meñ thī ye turfa ik karāmat

phirtī vo jis taraf ko phirtā udhar zamānā

ai vaqt-e-rafta aa jā phir vo samāñ dikhā jā

aisā bhī kyā thā jaanā phir lauT kar na aanā

ai nāḳhudā bhañvar se kashtī merī bachā kar

yārān-e-āshnā se bahr-e-ḳhudā milānā

dar fasl-e-gul ki gulshan naqsh-o-nigār bando

'nāzir' ḳhayāl-e-ḳhud-rā aur bazm-e-yār bando

ai baad-e-subh-gahi dil kei kali khila de

virana mere dil ka rashk-e-chaman bana de

us bazm-e-jaan-faza ka nazzara phir dikha de

gulzar-e-arzu mein phir taza gul khila de

ye kar-zar-e-hasti hai ranj-o-gham kei basti

phir yaad-e-bazm-e-jam mein ek jam-e-jam pila de

ab sham-e-zindagi kei zulmat hai chhane wali

wo subh-e-dil-kusha ka nazzara phir dikha de

pasti mein pa-ba-gil hai umr-e-rawan ka dariya

phir unchi wadiyon ke manzar use dikha de

wo ahd-e-shadmani wo itr-e-zindagani

ai daur-e-asmani wapas kahin se lade

ai baghban ho tujh ko taKHt-e-chaman mubarak

mujh ko wo ham-nawa de wo mera ghonsla de

kin hasraton se 'nazir' us anjuman se nikle

mela sa lag raha hai jab hum chaman se nikle

ahwal-e-bazm-e-gulshan ai nama-bar sunana

wo dastan hai dilkash rangin hai wo fasana

us bazm-e-dil-kusha mein ulfat kei us faza mein

taron kei raushni mein yaron ka mil ke gana

kanon mein rach rahi hai koyal kei kuk ab tak

'nazir' ka hai wazifa us dhun mein gungunana

collage kei sarzamin thi ya naqsh-e-dil-nashin thi

dil se KHayal us ka mumkin nahin bhulana

dariya mein mil ke jaise hon naddiyan ham-aghosh

begana kal jo aaya wo aaj tha yagana

bahr-e-tawaf jaana pir-e-mughan ke dar par

aur us kei ek nigah se sarmast ho ke aana

us chashm-e-mast mein thi ye turfa ek karamat

phirti wo jis taraf ko phirta udhar zamana

ai waqt-e-rafta aa ja phir wo saman dikha ja

aisa bhi kya tha jaana phir lauT kar na aana

ai naKHuda bhanwar se kashti meri bacha kar

yaran-e-ashna se bahr-e-KHuda milana

dar fasl-e-gul ki gulshan naqsh-o-nigar bando

'nazir' KHayal-e-KHud-ra aur bazm-e-yar bando