yak-nikati agenda

mahīna bhar sar ke baal na kaTvā.ūñ to mujhe kyā

dekhne vāloñ ko vahshat hone lagtī hai

har hafte hāthoñ aur pairoñ ke nāḳhun na luuñ to

mahsūs hotā hai jānvar bantā jā rahā huuñ

sub.h shave na banā.ūñ to ghar se nikalte jhijak aatī hai

Thahariye zarā maiñ dekh luuñ bāhar ye shor kaisā hai

are maalī lawn meñ ghaas kī machine pher rahā thā

aap to jānte haiñ ghaas na kaTe to machchhar jaan nahīñ chhoḌte

vaise kabhī aap ne tākistānoñ meñ añgūr kī TunD-munD muDhiyoñ ko dekhā hai

yaqīn hī nahīñ aatā ki un se na.ī shāḳheñ phūTeñgī

jo pattoñ aur guchchhoñ se lad jā.eñgī

abhī maiñ ne gulāb ke paudoñ kī apne hāthoñ se kāñT-chhāñT kī hai

merī aalim fāzil biivī kī jaan nikaltī jā rahī thī

jab maiñ bedardī se qaiñchī chalā rahā thā

lekin maiñ bāġhbānoñ kī aulād huuñ

dukh to mujhe bhī hotā hai

pale hue paudoñ aur daraḳhtoñ ko chhañgte hue

lekin phuul aur phal to us ke baġhair yuuñ samjhe rañg hī nahīñ laate

na vo husn na vo maza na vo bohtāt

aap bhī sochte hoñge punjab kā muqaddama laḌte laḌte

maiñ hajjāmoñ aur māliyoñ kī vakālat karne to nahīñ chal paḌā

saada sī baat hai ki insānoñ aur paudoñ kī tarāsh-ḳharāsh hotī rahnī chāhiye

lekin kyā baal kaTvā liye jaa.eñ nāḳhun le liye jaa.eñ shave kar lī jaa.e

to kaam ḳhatm ho jaatā hai

kyā insān sirf jism kā naam hai yā

jazbāt ḳhayālāt ḳhvāhishāt aur azā.em bhī hamārā hissa haiñ

to kyā jism ke saath un kī tarāsh-ḳharāsh bhī zarūrī hai

shāyad jazbāt aur ḳhayālāt kī tarāsh-ḳharāsh hī ko tahzīb kahte haiñ

shāyad ḳhvāhishātan aur azā.em kī nok-palak sañvārne hī se tamaddun ne janm liyā hai

varna to insān ġharaz-mandāna huqūq hī ke chakkar se nahīñ nikaltā

aur zimmadāriyoñ ke idrāk-o-ehsās kī naubat hī nahīñ aatī

muaaf kījiye ye saarī chorī-chakārī bad-kārī havas-kārī

ye saarī lūT-mār ja.al-sāzī harām-zadgī be-sabrī nā-shukr-guzārī

ye saarā jhuuT fareb lālach fitna fasād

jazbāt-o-ḳhayālāt aur ḳhvāhishāt-o-azā.im kī hajāmat na banāne hī kā to natīja hai

janāb jazbāt ko tamīz aur ḳhayālāt ko aḳhlāq na sikhāyā jaa.e

ḳhvāhishāt aur azā.em ke muñh par insāniyat kī lagām na dī jaa.e

to phir vahī kuchh hotā hai jo aaj hamāre yahāñ ho rahā hai

aur ye kah kar ziyāda din guzāra nahīñ ho saktā ki

is tarah to hotā hai is tarah ke kāmoñ meñ

aap hañseñge maiñ jab bhī ye misra.a paḌhtā huuñ

is tarah se mujhe usturā yaad aa jaatā hai

qaiñchiyāñ yaad aa jaatī haiñ hajāmat yaad aa jaatī hai

kuchh bhī ho maiñ to samajhtā huuñ ki qaumī sat.h par hamārī hajāmat bahut zarūrī ho ga.ī hai

hamāre sirf baal aur nāḳhun hī nahīñ baḌh ga.e

ham zāhir hī meñ nahīñ bātin meñ bhī jānvar bante jā rahe haiñ

jānvariyat hamāre dil-o-dimāġh meñ utar ga.ī hai

ab to andar bāhar hajāmat kī zarūrat hai

bha.ī bulāo kisī nashtar-ba-dast hajjām ko jo hajāmat banā.e aur fasd khole hamārī

lekin ek anaar aur sau bīmār

ek akelā hajjām aur chaudah karoḌ insān

ye to ham sab ko ḳhud hī ā.īne ke sāmne baiTh kar hajāmat banā.ī aur fasd kholnī paḌegī apnī

to bhā.iyo aur bahno

mere pyāre ham-vatano

aaj se qaumī sat.h par hamārā yak-nikātī agenda kyā Thahrā

boliye sab boliye puure zor se boliye

hajāmat

hajāmat

apnī apnī hajāmat

mahina bhar sar ke baal na kaTwaun to mujhe kya

dekhne walon ko wahshat hone lagti hai

har hafte hathon aur pairon ke naKHun na lun to

mahsus hota hai jaanwar banta ja raha hun

subh shawe na banaun to ghar se nikalte jhijak aati hai

Thahariye zara main dekh lun bahar ye shor kaisa hai

are mali lawn mein ghas ki machine pher raha tha

aap to jaante hain ghas na kaTe to machchhar jaan nahin chhoDte

waise kabhi aap ne takistanon mein angur ki TunD-munD muDhiyon ko dekha hai

yaqin hi nahin aata ki un se nai shaKHen phuTengi

jo patton aur guchchhon se lad jaengi

abhi main ne gulab ke paudon ki apne hathon se kanT-chhanT ki hai

meri aalim fazil biwi ki jaan nikalti ja rahi thi

jab main bedardi se qainchi chala raha tha

lekin main baghbanon ki aulad hun

dukh to mujhe bhi hota hai

pale hue paudon aur daraKHton ko chhangte hue

lekin phul aur phal to us ke baghair yun samjhe rang hi nahin late

na wo husn na wo maza na wo bohtat

aap bhi sochte honge punjab ka muqaddama laDte laDte

main hajjamon aur maliyon ki wakalat karne to nahin chal paDa

sada si baat hai ki insanon aur paudon ki tarash-KHarash hoti rahni chahiye

lekin kya baal kaTwa liye jaen naKHun le liye jaen shawe kar li jae

to kaam KHatm ho jata hai

kya insan sirf jism ka nam hai ya

jazbaat KHayalat KHwahishat aur azaem bhi hamara hissa hain

to kya jism ke sath un ki tarash-KHarash bhi zaruri hai

shayad jazbaat aur KHayalat ki tarash-KHarash hi ko tahzib kahte hain

shayad KHwahishatan aur azaem ki nok-palak sanwarne hi se tamaddun ne janm liya hai

warna to insan gharaz-mandana huquq hi ke chakkar se nahin nikalta

aur zimmadariyon ke idrak-o-ehsas ki naubat hi nahin aati

muaf kijiye ye sari chori-chakari bad-kari hawas-kari

ye sari luT-mar jal-sazi haram-zadgi be-sabri na-shukr-guzari

ye sara jhuT fareb lalach fitna fasad

jazbaat-o-KHayalat aur KHwahishat-o-azaim ki hajamat na banane hi ka to natija hai

janab jazbaat ko tamiz aur KHayalat ko aKHlaq na sikhaya jae

KHwahishat aur azaem ke munh par insaniyat ki lagam na di jae

to phir wahi kuchh hota hai jo aaj hamare yahan ho raha hai

aur ye kah kar ziyaada din guzara nahin ho sakta ki

is tarah to hota hai is tarah ke kaamon mein

aap hansenge main jab bhi ye misra paDhta hun

is tarah se mujhe ustura yaad aa jata hai

qainchiyan yaad aa jati hain hajamat yaad aa jati hai

kuchh bhi ho main to samajhta hun ki qaumi sath par hamari hajamat bahut zaruri ho gai hai

hamare sirf baal aur naKHun hi nahin baDh gae

hum zahir hi mein nahin baatin mein bhi jaanwar bante ja rahe hain

jaanwariyat hamare dil-o-dimagh mein utar gai hai

ab to andar bahar hajamat ki zarurat hai

bhai bulao kisi nashtar-ba-dast hajjam ko jo hajamat banae aur fasd khole hamari

lekin ek anar aur sau bimar

ek akela hajjam aur chaudah karoD insan

ye to hum sab ko KHud hi aaine ke samne baiTh kar hajamat banai aur fasd kholni paDegi apni

to bhaiyo aur bahno

mere pyare ham-watano

aaj se qaumi sath par hamara yak-nikati agenda kya Thahra

boliye sab boliye pure zor se boliye

hajamat

hajamat

apni apni hajamat