yaksui

ahd-e-gum-gashta kī tasvīr dikhātī kyuuñ ho

ek āvāra-e-manzil ko satātī kyuuñ ho

vo hasīñ ahd jo sharminda-e-īfā na huā

us hasīñ ahd kā mafhūm jatātī kyuuñ ho

zindagī sho.ala-e-be-bāk banā lo apnī

ḳhud ko ḳhākistar-e-ḳhāmosh banātī kyuuñ ho

maiñ tasavvuf ke marāhil kā nahīñ huuñ qaa.il

merī tasvīr pe tum phuul chaḌātī kyuuñ ho

kaun kahtā hai ki aa.heñ haiñ masā.ib kā ilaaj

jaan ko apnī abas rog lagātī kyuuñ ho

ek sarkash se mohabbat kī tamannā rakh kar

ḳhud ko aa.iin ke phandoñ meñ phañsātī kyuuñ ho

maiñ samajhtā huuñ taqaddus ko tamaddun kā fareb

tum rusūmāt ko īmān banātī kyuuñ ho

jab tumheñ mujh se ziyāda hai zamāne kā ḳhayāl

phir mirī yaad meñ yuuñ ashk bahātī kyuuñ ho

tum meñ himmat hai to duniyā se baġhāvat kar do

varna maañ baap jahāñ kahte haiñ shādī kar lo

ahd-e-gum-gashta ki taswir dikhati kyun ho

ek aawara-e-manzil ko satati kyun ho

wo hasin ahd jo sharminda-e-ifa na hua

us hasin ahd ka mafhum jatati kyun ho

zindagi shoala-e-be-bak bana lo apni

KHud ko KHakistar-e-KHamosh banati kyun ho

main tasawwuf ke marahil ka nahin hun qail

meri taswir pe tum phul chaDati kyun ho

kaun kahta hai ki aahen hain masaib ka ilaj

jaan ko apni abas rog lagati kyun ho

ek sarkash se mohabbat ki tamanna rakh kar

KHud ko aain ke phandon mein phansati kyun ho

main samajhta hun taqaddus ko tamaddun ka fareb

tum rusumat ko iman banati kyun ho

jab tumhein mujh se ziyaada hai zamane ka KHayal

phir meri yaad mein yun ashk bahati kyun ho

tum mein himmat hai to duniya se baghawat kar do

warna man bap jahan kahte hain shadi kar lo