ye baat samajh mein aai nahin

ye baat samajh meñ aa.ī nahīñ

ye baat samajh meñ aa.ī nahīñ

ammī ne mujhe samjhā.ī nahīñ

maiñ kaise mīThī baat karūñ

jab mīThī chijjī khaa.ī nahīñ

aapī bhī pakātī haiñ halva

phir vo bhī kyoñ halvā.ī nahīñ

ye baat samajh meñ aa.ī nahīñ

naanī ke miyāñ to naanā haiñ

daadī ke miyāñ bhī daadā haiñ

jab aapā se maiñ ne pūchhā

baajī ke miyāñ kyā baajā haiñ

vo hañs hañs kar ye kahne lagīñ

ai bhaa.ī nahīñ ai bhaa.ī nahīñ

ye baat samajh meñ aa.ī nahīñ

jab nayā mahīna aatā hai

bijlī kā bill aa jaatā hai

hālāñki bādal bechāra

ye bijlī muft luTātā hai

phir ham ne apne ghar bijlī

kyoñ bādal se lagvā.ī nahīñ

ye baat samajh meñ aa.ī nahīñ

gar billī sher kī ḳhāla hai

phir ham ne use kyoñ paalā hai

kyā sher bahut nālā.eq hai

ḳhāla ko maar nikālā hai

yā jangal ke raajā ke yahāñ

kyā miltī duudh malā.ī nahīñ

ye baat samajh meñ aa.ī nahīñ

kyoñ lambe baal haiñ bhālū ke

kyoñ us kī TinD karā.ī nahīñ

kyā vo bhī ganda bachcha hai

yā us ke abbū bhaa.ī nahīñ

ye us kā hair style hai

yā jangal meñ koī naa.ī nahīñ

ye baat samajh meñ aa.ī nahīñ

jo taare jhilmil karte haiñ

kyā un kī chāchī taa.ī nahīñ

hogā koī rishta sūraj se

ye baat hameñ batlā.ī nahīñ

par chandā kaisā māmūñ hai

jab ammī kā vo bhaa.ī nahīñ

ye baat samajh meñ aa.ī nahīñ

ye baat samajh mein aai nahin

ye baat samajh mein aai nahin

ammi ne mujhe samjhai nahin

main kaise miThi baat karun

jab miThi chijji khai nahin

aapi bhi pakati hain halwa

phir wo bhi kyon halwai nahin

ye baat samajh mein aai nahin

nani ke miyan to nana hain

dadi ke miyan bhi dada hain

jab aapa se main ne puchha

baji ke miyan kya baja hain

wo hans hans kar ye kahne lagin

ai bhai nahin ai bhai nahin

ye baat samajh mein aai nahin

jab naya mahina aata hai

bijli ka bill aa jata hai

haalanki baadal bechaara

ye bijli muft luTata hai

phir hum ne apne ghar bijli

kyon baadal se lagwai nahin

ye baat samajh mein aai nahin

gar billi sher ki KHala hai

phir hum ne use kyon pala hai

kya sher bahut nalaeq hai

KHala ko mar nikala hai

ya jangal ke raja ke yahan

kya milti dudh malai nahin

ye baat samajh mein aai nahin

kyon lambe baal hain bhaalu ke

kyon us ki TinD karai nahin

kya wo bhi ganda bachcha hai

ya us ke abbu bhai nahin

ye us ka hair style hai

ya jangal mein koi nai nahin

ye baat samajh mein aai nahin

jo tare jhilmil karte hain

kya un ki chachi tai nahin

hoga koi rishta suraj se

ye baat hamein batlai nahin

par chanda kaisa mamun hai

jab ammi ka wo bhai nahin

ye baat samajh mein aai nahin