ye baghawat hai

rauñdte jaao guzargāhoñ ko

sar uThā.e hue

siina taane

kaañp jaa.eñ dar-o-dīvār

qadam yuuñ uTheñ

dhaḌkaneñ dil kī baneñ bāñg-e-rahīl

ye baġhāvat hai

baġhāvat hī sahī

ham ne anjām-e-vafā dekh liyā

ḳhas-o-ḳhāshāk bahātā huā apnā sailāb

ab jo uThā hai to baḌhtā hī chalā jā.egā

ye zar-o-sīm ke tūdoñ se nahīñ ruk saktā

goliyāñ

kis ko Darāte ho

ye Das saktī haiñ

Das jaane do

be-navā sust-qadam vāmāñda

saal aate the chale jaate the

vaqt ke dāman ḳhush-rañg pe kaale dhabbe

ḳhushk-lab hāñpte bebas ayyām

raah ke beach meñ uljhe hue rah jaate the sustāne ko

ghabrā.e hue

ab to har saañs dahaktā huā añgāra hai

dil ki barfāb the ab ātish-e-sayyāl kā favvāra haiñ

barq-raftār hai vaqt

aur ham vaqf se do-chār qadam aage haiñ

chīḳh uTheñ qarnā.eñ

jhāñjh bajeñ

dhuum ho naqqāroñ kī

muskurāte hue gaate hue baḌhte jaao

pheñkte haiñ hameñ tāroñ pe kamand

ḳhema-zan honā hai mirrīḳh ke maidānoñ meñ

raundte jao guzargahon ko

sar uThae hue

sina tane

kanp jaen dar-o-diwar

qadam yun uThen

dhaDkanen dil ki banen bang-e-rahil

ye baghawat hai

baghawat hi sahi

hum ne anjam-e-wafa dekh liya

KHas-o-KHashak bahata hua apna sailab

ab jo uTha hai to baDhta hi chala jaega

ye zar-o-sim ke tudon se nahin ruk sakta

goliyan

kis ko Daraate ho

ye Das sakti hain

Das jaane do

be-nawa sust-qadam wamanda

sal aate the chale jate the

waqt ke daman KHush-rang pe kale dhabbe

KHushk-lab hanpte bebas ayyam

rah ke beach mein uljhe hue rah jate the sustane ko

ghabrae hue

ab to har sans dahakta hua angara hai

dil ki barfab the ab aatish-e-sayyal ka fawwara hain

barq-raftar hai waqt

aur hum waqf se do-chaar qadam aage hain

chiKH uThen qarnaen

jhanjh bajen

dhum ho naqqaron ki

muskuraate hue gate hue baDhte jao

phenkte hain hamein taron pe kamand

KHema-zan hona hai mirriKH ke maidanon mein